მინდია ჯანელიძე: საიდუმლო თემებზე საჯაროდ საუბარი, ჩვენი ქვეყნის უსაფრთხოებისთვის ზიანის მომტანია

2015-03-30 12:41:18, 339 ნახვა

პოლიტიკა

"რაც უფრო მეტს ვილაპარაკებთ საიდუმლო საკითხებზე და რაც უფრო მეტი მითქმა-მოთქმა იქნება, ჩვენი ქვეყნის თავდაცვის ინტერესები მით უფრო დაზიანდება", - ამის შესახებ თავდაცვის მინისტრმა მინდია ჯანელიძემ ჟურნალისტებს განუცხადა.
რაც შეეხება ირაკლი ალასანიას განცხადებას საჰაერო თავდაცვის შეთანხმებასთან დაკავშირებით და რომ ამ ხელშეკრულებას ვადა ეწურება, მინდია ჯანელიძემ კიდევ ერთხელ განმარტა, რომ არანაირი ხელშეკრულება ბუნებაში არ არსებობს.
"არანაირი ხელშეკრულება ბუნებაში არ არსებობს. ეს ერთი, მეორე, არაფერს ვადა არ ეწურება. პროცესი კი მდინარეობს ჩვეულ რიტმში, წარმატებით. ყველა ნაბიჯი, რაც საჭიროა ჩვენი ქვეყნის თავდაცვის შესაძლებლობის გასაუმჯობესებლად, იდგმება.რაც უფრო მეტს ვილაპარაკებთ ამ საკითხზე და რაც უფრო მეტი მითქმა-მოთქმა იქნება, მით უფრო დაზიანდება ქვეყნის თავდაცვის ინტერესები.ჩვენ გვაქვს ბევრი გამოწვევა თავდაცვისა და უსაფრთხოების სფეროში და ყოველი ზედმეტი სიტყვა, მითუმეტეს, საიდუმლო თემებზე ღიად და საჯაროდ საუბარი, მხოლოდ ზიანის მომტანია ჩვენი ქვეყნის უსაფრთხოებისთვის. ამ საკითხზე საუბარი არც არასდროს ყოფილა.თავად ალასანიას ჰკითხეთ",-განაცხადა მინდია ჯანელიძემ, რომელმაც ჟურნალისტის კითხვაზე-მსგავსი ხელშეკრულება რომ ყოფილიყო, მოაწერდა თუ არა ხელს, უპასუხა, რომ, რა თქმა უნდა, მოაწერდა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან