კობახიძე: მიღებული მოსაზრებები რომ დავაჯამოთ, შეიძლება მოცულობაში სამჯერ გაზრდილი კონსტიტუცია მივიღოთ

2017-01-21 12:21:51, 1173 ნახვა

პოლიტიკა

პარლამენტის თავმჯდომარის ირაკლი კობახიძის განცხადებით, კომისიის წევრებისგან მიღებული მოსაზრებების შეჯამებისას, შეიძლება, მოცულობაში სამჯერ გაზრდილი კონსტიტუცია მივიღოთ.

როგორც კობახიძემ საკონსტიტუციო კომისიის პირველი სხდომის დაწყებისას აღნიშნა, კომისიის წევრების მიერ წარმოდგენილი მოსაზრებები საკმაოდ მრავალრიცხოვანია.

„დღეს იმართება პირველი სამუშაო ჯგუფის სხდომა. ყველაზე მრავალრიცხოვანი ჯგუფი შეიქმნა ამ სფეროში - ადამიანის უფლებების, მართლმსაჯულების სფეროში, რაც ძალიან სასიამოვნო მოვლენაა და ეს მოწმობს განსაკუთრებულ ინტერესს ადამიანის უფლებების, მართლმსაჯულების საკითხების მიმართ და მოხარული ვართ ამით”, - განაცხადა კობახიძემ.

ამასთან, ირაკლი კობახიძემ კომისიის წევრებს მუშაობის პრინციპი გააცნო.

”ძირითადად 3 ეტაპად წარმოგვიდგენია მუშაობის პროცესი, დღეს გვინდა მოსაზრებები შევკრიბოთ, რომლებიც შემდეგ უკვე აისახება პირველად პროექტში. აღნიშნული პროექტი კი დარიგდება მეორე სხდომისთვის. კომისიის ბევრმა წევრმა უკვე წარმოადგინა მოსაზრებები, რომლებსაც დღეს განვიხილავთ. გვექნება აბსოლუტურად ღია მსჯელობა, დისკუსია და შეგვიძლია მუხლობრივად განვიხილოთ მოსაზრებები. თითოეულ ჩვენგანს ექნება შესაძლებლობა გამოთქვას საკუთარი შენიშვნები და მოსაზრებები, რომლის საფუძველზეც მომზადდება კანონპროექტი, რომელიც სამუშაო ჯგუფის მეორე სხდომაზე დარიგდება. ზოგადი ტენდენცია რაც ვლინდება არის ტექსტის განვრცობის ტენდენციაა. რომ დავაჯამოთ მოსაზრებები, რომლებიც მივიღეთ კომისიის წევრებისგან, შეიძლება მოცულობაში სამჯერ გაზრდილი კონსტიტუცია მივიღოთ, რაც არ ვიცი რამდენად მიზანშეწონილია. სასურველია მაქსიმალურად ლაკონური იყოს კონსტიტუციის ტექსტი, სადაც საჭიროა ტექსტის განვრცობა, სტანდარტების აწევა და ა.შ. ბუნებრივია, ღია უნდა ვიყოთ ასეთი მსჯელობისთვის”, - აღნიშნა პარლამენტის თავმჯდომარემ.

ცნობისთვის, პარლამენტში საკონსტიტუციო კომისიის პირველი სამუშაო სხდომა მიმდინარეობს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან