„ოფიცრის მუნდირი იმისთვის არ არსებობს, რომ თუ პატიმარმა დედა შეგაგინა, შენც შეაგინო, ან ხელი გაარტყა, ამისთვის ქუჩა არსებობს“

2016-12-28 23:38:31, 1105 ნახვა

საზოგადოება

ოფიცრის მუნდირი იმისთვის არ არსებობს, რომ თუ პატიმარმა დედა შეგაგინა, შენც შეაგინო, ან ხელი გაარტყა, ამისთვის ქუჩა არსებობს, - ამის შესახებ სასჯელაღსრულებისა და პრობაციის მინისტრმა, კახა კახიშვილმა გადაცემა 2030-ში განაცხადა.

მინისტრის განცხადებით, ადრე, დაწესებულებაში დირექტორი ჭეშმარიტების ბოლო ინსტანცია იყო და როცა თანამშრომელი სამსახურში მიდიოდა, მან იცოდა, რომ დირექტორის ნებისმიერი, კანონიერი თუ უკანონო ბრძანება უნდა შეესრულებინა. ახლა, თავისი უფლებამოსილებისა და კომპეტენციის ზღვარი თითოეულმა თანამშრომელმა იცის და თუ ის თავის უფლებამოსილებას გააბიჯებს, პასუხიმგებლობა მთლიანად მას დაეკისრება.

როგორც მან აღნიშნა, კანონის მოთხოვნების დაცვის მიზნით, სისტემაში თანამშრომლებისა და პატიმრების მიმართ უკომპრომისო მიდგომა არსებობს.

„არის შემთხვევები, როცა პატიმრები განცხადებებს წერენ. ეს განცხადებები უმეტესად, განსაკუთრებული რისკის დაწესებულებიდან იწერება, რათა შეგნებულად შექმნან სურათი, თითქოს, ვიღაც მათი უფლებების შელახვას ახდენს. ამას იმიტომ აკეთებენ, რომ ყურადღება მიიქციონ და მერე გევაჭრონ, რომ ღია ტიპის დაწესებულებაში გადაიყვანო. კანონის მოთხოვნა არსებობს როგორც პატიმრის, ასევე თანამშრომლის მიმართაც. იქ, სადაც ვალდებულება არ არის, უფლებაც არ არსებობს. არ შეიძლება, უფლება ვალდებულების გარეშე წარმოიქმნას. ვალდებულება და უფლება აქვთ როგორც თანამშრომლებს, ასევე - პატიმრებს“, - განაცხადა სასჯელაღსრულებისა და პრობაციის მინისტრმა.

მისივე თქმით, შესაძლოა, რაღაც მოხდეს, რომელიმე თანამშრომელს ან პატიმარს ნერვებმა უმტყუნოს, მაგრამ ეს იმას არ ნიშნავს, რომ ურთიერთდამოკიდებულება ღირსების შემლახავი უნდა იყოს.

„კანონის დამრღვევი თანამშრომლებისა და პატიმრის მიმართ კანონით დადგენილი სანქციები არსებობს. იყო ხოლმე შემთხვევა, როცა თანამშრომელი ამბობდა, რომ პატიმარმა დედა შეაგინა, მაგრამ ოფიცრის მუნდირი იმისთვის არ არსებობს, რომ თუ პატიმარმა დედა შეგაგინა, შენც შეაგინო, ან ხელი გაარტყა, ამისთვის ქუჩა არსებობს. არის ხოლმე გადაცდომები, მაგრამ ამ საკითხებს გენერალური ინსპექცია სწავლობს და არსებული რეგულაციების დარღვევის გამო, სისტემაში ძალიან ბევრი თანამშრომლის პასუხისმგებლობის საკითხი დადგა“, - განაცხადა კახიშვილმა.

მანა აქვე აღნიშნა, რომ სისტემაში ახალი მექანიზმი შემოდის, რაც იმას გულისხმობს, რომ თუ განსაკუთრებით მძიმე დანაშაულისთვის მსჯავრდებულებს პირობით ვადამდე ადრე გათავისუფლება სასჯელის ¾-ის მოხდის შემდეგ ეხებათ, იქნება საშუალება, 2/3-ის მოხდის შემდეგ მათ შინაპატიმრობა შეეხოთ.

„თუ ეს კანონპროექტი მიღებულ იქნა, ადამიანს მივცემთ საშუალებას, 2/3-ში პირობით ვადამდე ადრე ციხიდან შინაპატიმრობით გათავისუფლდეს და კონტროლის ქვეშ იყოს, რათა ერთის მხრივ, მისი საზოგადოებაში ინტეგრაცია მოხდეს, მეორე მხრივ კი, ეს კრიმინოგენულ ვითარებაზე არ ისახოს. 21-ე საუკუნეში ტექნოლოგიები ისეთი კონტროლის საშუალებას იძლევა, რომ ადამიანი მაინცდამაინც ციხეში არ გამოკეტო”, განაცხადა მინისტრმა.

მისივე თქმით, კიდევ ერთი ნოვაცია, რომელიც უკვე ინიცირებულია, არის ის, რომ დედებს საშუალება მიეცემათ, შაბათ-კვირას დაწესებულებიდან გამოვიდნენ და ეს დღეები შვილებთან ერთად გაატარონ.

„ეს შეეხება იმ დედებს, რომლებსაც დაწესებულებაში 3 წლამდე შვილი ჰყავდათ. კანონით, 3 წლის ასაკის ბავშვი დახურული სივრციდან უნდა გამოიყვანო, მაგრამ ეს პროცესი დედებისთვის, შვილებისთვის და ჩვენთვის ძალიან მტკივნეულია და ასეთი მექანიზმი ამიტომ მოვიფიქრეთ“, - განაცხადა კახა კახიშვილმა.

ამავე თემაზე:

კახა კახიშვილი: ვცდილობთ, შევქმნათ სისტემა, რომლის მართვაც ერთი ადამიანის ნებაზე და ხასიათზე დამოკიდებული არ იქნება.

სასჯელაღსრულების მინისტრი: რაღაც ტიპის ხარჯვაზე უარს ვიტყვით, მაგრამ ეს თანამშრომლების სამსახურიდან გაშვებაზე არ აისახება.