ამერიკის შეერთებული შტატები რუსეთსა და აფხაზეთს შორის ჯარების გაერთიანებული დაჯგუფების შექმნის შესახებ ე.წ. შეთანხმების ლეგიტიმურობას არ აღიარებს, - ამის შესახებ სახელმწიფო დეპარტამენტის ოფიციალურ ვებგვერდზე გამოქვეყნებულ განცხადებაშია აღნიშნული.

"აშშ რუსეთის ფედერაციის მიერ საქართველოს სეპარატისტული რეგიონის აფხაზეთის დეფაქტო ლიდერებთან ერთიანი სამხედრო ძალის შესახებ შეთანხმების რატიფიცირებას ეწინააღმდეგება. ჩვენ არ ვაღიარებთ ე.წ. შეთანხმების ლეგიტიმურობას", - ნათქვამია განცხადებაში.

ამასთან, სახელმწიფო დეპარტამენტი აღნიშნავს, რომ შეერთებული შტატები საქართველოს ტერიტორიული მთლიანობის მხარდაჭერას განაგრძობს.

"აფხაზეთთან და სამხრეთ ოსეთთან დაკავშირებით აშშ-ის პოზიცია მკაფიო რჩება - ეს რეგიონები საქართველოს ნაწილია და ჩვენ ვაგრძელებთ საქართველოს დამოუკიდებლობის, სუვერენიტეტისა და ტერიტორიული მთლიანობის მხარდაჭერას. რუსეთმა უნდა შეასრულოს ცეცხლის შეწყვეტის შესახებ  2008 წლის შეთანხმებით ნაკისრი ვალდებულებები, გაიყვანოს ძალები კონფლიქტამდელ პოზიციებზე, უკან გაიხმოს საქართველოს რეგიონების, სამხრეთ ოსეთისა და აფხაზეთის დამოუკიდებელ სახელმწიფოებად აღიარება და ამ რეგიონებში ჰუმანიტარული დახმარების თავისუფალი წვდომა უზრუნველყოს”, - ნათქვამია აშშ-ის სახელმწიფო დეპარტამენტის განცხადებაში.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ტრამპის საპასუხოდ სადაც მან ნორვეგიას საპირფარეშო უწოდა, ქვეყნის ტურიზმის სააგენტომ დიდებული არქიტექტურის ტუალეტები აჩვენა

თბილისის მერია - გავრცელებულ ვიდეოში ასახული სამარხი განკუთვნილია სხვადასხვა მიზეზით გარდაცვლილი ძაღლების ნეშტების განსათავსებლად

აშშ-მ მოსკოვის ერთ-ერთ ყველაზე მონახულებად პარკში შესაძლო ტერორისტული თავდასხმის შესახებ გააფრთხილა

ინდოეთმა რუსეთს უვიზო მიმოსვლაზე უარი უთხრა