უკრაინელი დეპუტატები სააკაშვილის სისხლის სამართლის პასუხისგებაში მიცემას ითხოვენ

2016-11-02 18:43:43, 1255 ნახვა

პოლიტიკა

უკრაინის რადა-ს დეპუტატები გენერალურ პროკურატურას განცხადებით მიმარტავენ და ოდესის ოლქის გუბერნატორის, მიხეილ სააკაშვილის წინააღმდეგ გამოძიების დაწყებას მოითხოვენ, - ამის შესახებ უკრაინული მედია RBC.UA იუწყება.

მედია საშუალების ინფორმაციით, საქმე საპორტო ქარხნის „თანხების შემცირებას“ ეხება.

როგორც უწყებაში აცხადებენ, უკრაინის გენერალური პროკურატურა აღნიშნულ ფაქტთან დაკავშირებით გამოძიებას სისხლის სამართლის კოდექსის 364-ე მუხლით აღძრავს, რაც სამსახურეობრივი უფლებამოსილების გადამეტებასა და თანამდებობის ბოროტად გამოყენებას გულისხმობს.

2016 წლის 12 სექტემბერს, რადა-ს დეპუტატებმა, კერძოდ კი ფრაქცია "სახალხო ფრონტის" წევრებმა ნიკოლაი კნიაჟიცკიმ, პაველ პინზენიკმა, ალექსანდრ დროზდიკმა და "ბლოკ პოროშენკოს" წევრმა დიმიტრი გოლუბოვმა უკრაინის გენერალურ პროკურატურას ოდესის სამხარეო ადმინისტრაციის თავმჯდომარის მიხეილ სააკაშვილის მიერ ჩადენილი შესაძლო დანაშაულის შესახებ განცხადება წარუდგინეს.

დეპუტატები სააკაშვილს უფლებამოსილების გადამეტებაში, გაყალბებაში, უკანონო საქმიანობაში ადანაშაულბენ და მის წინააღმდეგ გამოძიების დაწყებას უკრაინის სისხლის სამართლის კოდექსის 206-ე, 364-ე, 366-ე, 383-ე მუხლებით აღძვრა მოითხოვეს. როგორც განცხადების ავტორები ამბობებ, სააკაშვილის მიერ ჩადენილმა შესაძლო დანაშაულებმა, სახელმწიფოს სერიოზული ზიანი მიაყენა.

მათივე თქმით, ფინანსური ზარალი 6.5 მილიარდ გრივნას აღემატება. განცხადების საპასუხოდ, უკრაინის გენერალური პროკურორის მოადგილემ ნაზარ ხოლოდნიცკიმ აღნიშნა, რომ სახალხო დეპუტატთა განცხადების, ასევე პროკურატურაში არსებული მასალებისა და მიმდინარე წლის 7 ოქტომბერს რეესტრში წინასწარი გამოძიების საფუძველზე მიღებული შესაბამისი ინფორმაციის თანახმად, აღნიშნულ საქმეს სამართლებრივი კვალიფიკაცია 364-ე მუხლით უნდა მიენიჭოს. სისხლის სამართალწარმოებას 42016000000002785 ნომერი მიენიჭა.

დოკუმენტში ასევე ნათქვამია, რომ აღნიშნული საკითხის გამოძიება ეროვნულ ანტიკორუფციულ ბიუროს დაევალა.