კაკო ტიბუასთვის 10 ათას ლარიანი გირაოს შეფარდებას პროკურატურა გაასაჩივრებს

2016-10-14 15:02:53, 1613 ნახვა

სამართალი

ჯიხაშკარში არჩევნებისთვის ხელის შეშლის ბრალდებით დაკავებულ კაკო ტიბუას 10 ათას ლარიანი გირაოს სანაცვლოდ გაათვისუფლებენ.

შესაბამისი გადაწყვეტილება ზუგდიდის რაიონულმა სასამართლომ მიიღო. თუმცა, პროკურატურა სასამართლოს გადაწყვეტილებას არ ეთანხმება და მას ზემდგომ ინსტანციაში გაასაჩივრებს. სახელმწიფო ბრალდება ტიბუასთვის აღკვეთის ღონისძიების სახით, პატიმრობის შეფარდებას მოითხოვს.

შეგახსენებთ, სამეგრელოში, ზუგდიდის რაიონის სოფელ ჯიხაშკარში პირთა ჯგუფი 79-ე საარჩევნო უბანზე შეიჭრა. მათ საარჩევნო ყუთი გატეხეს, მინები ჩაამსხვრიეს, ინვენტარი დააზიანეს და დამკვირვებლების კუთვნილი მობილური ტელეფონები გაიტაცეს. ერთ-ერთმა თავდამსხმელმა საერთაშორისო დამკვირვებელს ფიზიკური შეურაცხყოფა მიაყენა. დაზარალებულს პირველადი სამედიცინო დახმარება გაეწია. მისი ჯანმრთელობის მდგომარეობა დამაკმაყოფილებელია. აღნიშნულ ფაქტთან დაკავშირებით, შსს-მ გამოძიება სსკ-ს 162-ეს პრიმა (კენჭისყრის შენობაში, საარჩევნო კომისიის განთავსების ადგილას ან მათ მიმდებარე ტერიტორიაზე, ან წინასაარჩევნო აგიტაციის ან წინასაარჩევნო კამპანიის ღონისძიების დროს ძალადობა ან ძალადობის მუქარა) და 163-ე მუხლებით (საარჩევნო ან სარეფერენდუმო კომისიის მუშაობისათვის ხელის შეშლა) დაიწყო.

ასევე, უცნობი პირები შეიჭრენ სოფელ ჯიხაშკარის N 108-ე საარჩევნო უბანზეც, გატეხეს საარჩევნო ყუთი, ჩაამსხვრიეს მინები და დააზიანეს ინვენტარი. ფაქტზე გამოძიება სსკ-ს 163-ე მუხლით მიმდინარეობს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან