პრემიერი: ჩვენი ამოცანაა რაც შეიძლება მაქსიმალურად მოვაშოროთ პოლიტიკა სკოლასა და განათლების სისტემას

2016-10-02 14:48:58, 852 ნახვა

საზოგადოება

„ჩვენი უმთავრესი მიმართულებაა, სკოლასა და განათლების სისტემას პოლიტიკა რაც შეიძლება მაქსიმალურად მოვაშოროთ“,-ამის შესახებ პრემიერ-მინისტრმა გიორგი კვირიკაშვილმა საგამოფენო ცენტრ „ექსპო-ჯორჯიაში“ პედაგოგებთან შეხვედრაზე განაცხადა.

პრემიერის თქმით, პედაგოგებთან დღევანდელი შეხვედრა ემსახურება იმას, რომ მომავალ საქმიანობაში მათი აზრი გაითვალისწინონ.

„ვინაიდან, სამწუხაროდ საქართველოში პოლიტიკა ჯერ კიდევ დაპირისპირებასა და კონფრონტაციასთან ასოცირდება, ჩვენი უმთავრესი მიმართულებაა, სკოლასა და განათლების სისტემას რაც შეიძლება მაქსიმალურად მოვაშოროთ პოლიტიკა. იცით, რომ წინასაარჩევნო პერიოდია, მაგრამ მე არ მეშინია ამის თქმის, რადგან ჩვენი სიძლიერე ამაში უნდა იყოს. ჩვენ მაქსიმალურად უნდა შევძლოთ, რომ ფოკუსირება განათლების ხარისხზე გავაკეთოთ. დღევანდელი შეხვედრა ემსახურება იმას, რომ მოვისმინო თქვენი მოსაზრებები და გავითვალისწინოთ ის ჩვენს მომავალ საქმიანობაში“,-აღნიშნა კვირიკაშვილმა.

ცნობისთვის, ამ წუთებში პრემიერისა და განათლების მინისტრის შეხვედრა პედაგოგებთან კითხვა-პასუხის რეჟიმში მიმდინარეობს.