საქართველოს პარლამენტის თავმჯდომარის დავით უსუფაშვილის შეფასებით,  საქართველოში 5%-იანი ბარიერის გადალახვა, მითუმეტეს იმ პარტიის მხრიდან, რომელსაც კოალიციაში ყოფნის გამო, 4 წლის განმავლობაში პარტიული  აქტიურობა მინიმუმადე ჰქონდა დაყვანილი, მარტივი არ არის. თუმცა, ოპტიმისტურადაა განწყობილი და ამბობს, რომ "რესპუბლიკურ პარტიას" არჩევნებზე ამის  შანსები აქვს.

რას ფიქრობს დავით უსუფაშვილი  NDI-ის კვლევებზე, შესაძლებელია თუ არა "რესპუბლიკურმა პარტიამ" არჩევნების შემდეგ   „ქართულ ოცნებასთან“ კვლავ ითანამშრომლოს,  როგორ აფასებს  საკონსტიტუციო სასამართლოს ირგვლივ განვითარებულ მოვლენებს, არსებობენ თუ არა კოალიციურ სისტემაში პრორუსული ადამიანები, ჰქონდა  თუ არა ბოლო პერიოდში ბიძინა ივანიშვილთან კონსულტაცია და სთავაზობდა თუ არა ის მხოლოდ მას  და არა პარტიას „ქართულ ოცნებაში“ გაწევრიანებას- ეს იმ საკითხების არასრული ჩამონათვალია, რომელთან დაკავშირებითაც "ექსპრესნიუსი" პარლამენტის თავმჯდომარეს,  დავით უსუფაშვილს ესაუბრა:

ბატონო დავით, როგორ შეაფასებდით მომავალ საპარლამენტო არჩევნებში „რესპუბლიკელების“ შანსს და ფიქრობთ თუ არა, რომ ბარიერს გადალახავთ? NDI-ის კვლევების მიხედვით, გამოკითხულთა 2% გიჭერთ მხარს...

- ერთი თვის წინ ამერიკელი დემოკრატების ყრილობაზე გახლდით ფილადელფიაში და NDI-ის ყველა ხელმძღვანელი იქ ბრძანდებოდა. ერთ-ერთმა მოსაუბრემ თქვა, რომ CNN-ის კვლევებით ჰილარი კლინტონს 60%-მდე უარყოფითი რეიტინგი აქვს. ამაზე NDI-ის ხელმძღვანელების პასუხი იყო, რომ ბევრი სხვა კვლევაც ტარდება და ჰილარის რეიტინგიც არჩევნებზე გაირკვევა. ასე რომ ამ კვლევის დეტალური კომენტარებისგან თავს შევიკავებ. არჩევნებზე შანსები გვაქვს ჩვენც, ისევე როგორც რამოდენიმე სხვა პარტიას. საქართველოში 5%-იანი ბარიერის გადალახვა ადვილი ამოცანა არ არის. მით უმეტეს პარტიისთვის, რომელიც ბოლო 4 წელია  კოალიციურ სისტემაში იყო და პარტიული აქტიურობა მინიმუმამდე ჰქონდა დაყვანილი.  ამიტომ, ჩვენ საარჩევნო კამპანია 12 ივნისს დავიწყეთ.  უახლოეს ხანებში ჩვენი მაჟორიტარების გააქტიურებას ველით და არჩევნებისადმი ძალიან ოპტიმისტურად ვარ  განწყობილნი. დარწმუნებული ვარ, რომ თუ „ნაციონალებს“ სურთ ხელისუფლებაში დაბრუნება, მათი ამოცანის რეალისტურობა გაცილებით დაბალია, ვიდრე „რესპუბლიკური პარტიის“ პარლამენტში ღირსეულად შესვლა. თუ „ქართულ ოცნებას“  არჩევნებზე  საკონსტიტუციო უმრავლესობის მიღება სურს, ესეც ასევე ნაკლებად რეალისტურია, ვიდრე „რესპუბლიკელების“ პარლამენტში შესვლა. ჩვენ იმ სუბიექტებს შორის არ ვართ, რომელსაც ყველაზე მეტად უჭირს საკუთარი ამოცანის შესრულება. ჩვენი მთავარი მესიჯის ოფიციალური პრეზენტაცია იქნება მომავალი კვირის დასაწყისში. ჩვენი ღირებულებები უცვლელია - ადამიანი და თავისუფლება. ამას ამდენი წელი ვემსახურებოდით და მომავალშიც ასევე გაგრძელდება. ჩვენ პროფესიონალებისა და კვალიფიციური პოლიტიკოსების პარტია ვართ. მიუხედავად იმისა, რომ რაოდენობრივად ცოტანი ვიყავით, ოპოზიციასა და ხელისუფლებაშიც ყოველთვის საკმარისი წონა გვქონდა.

რით არის გამოწვეული, რომ ამომრჩეველთა უმეტესობას გადაწყვეტილი არ აქვს, (NDI-ს კვლევის თნაახმად 57%-მა) თუ ვის მისცეს ხმა?

- ის რომ არჩევნებზე წამსვლელმა 57%-მა არ იცის ვის მისცეს ხმა, პოლიტიკურ სისტემაზე ცუდად მეტყველებს.  ეს ნიშნავს, რომ პოლიტიკურმა ძალებმა მეტი დრო მოვანდომეთ ერთმანეთის ლანძღვა გინებასა და ნაკლები ვილაპარაკეთ პოზიტივზე. ვისურვებდი, პოლიტიკური პარტიები და ლიდერები ამ საკითხზე უფრო ღრმად ჩავფიქრდეთ. ამ დონის გაურკვევლობა ხიფათის შემცველიცაა და საქმე ძალიან მოულოდნელი შედეგისკენ შეიძლება  წავიდეს.  ვისურვებდი, სექტემბრის შუა რიცხვებამდე მეტი დრო დავუთმოთ ჩვენი ხედვების წარმოდგენასა და ქვეყანა დავიცვათ ძალიან დიდი მოულოდნელობისგან.

NDI-ის კვლევის თანახმად, ამომრჩევლეთა 35%-ის არჩევანზე, მნიშვნელოვან გავლენას მრევლისა და მღვდლის პოლიტიკური შეხედულება მოახდენს... როგორ შეაფასებდით ამ ფაქტს, რომ ამომრჩეველთა აღნიშნული ნაწილი, პარტიებს მხარს არა საარჩევნო პროგრამის, არამედ ეკლესიის გავლენით უჭერს?

- ეკლესიის გავლენა მნიშვნელოვანი უნდა იყოს ჩვენს სულიერ ცხოვრებაზე, ჩვენს ღირებულებით სისტემაზე, მაგრამ ჩვენ ვერასდროს შევქმნით ფუნქციონირებად სახელმწიფოს მანამ, სანამ მოქალაქეები თავიანთი პასუხისმგებლობით არ მიიღებენ გადაწყვეტილებებს.  ძალიან ხშირად ჩვენი თანამოქალაქეები პასუხისმგებლობას გაურბიან, როდესაც აცხადებენ რომ ვინმეს რჩევას დაეკითხებიან და ა.შ. პოლიტიკური პროცესი ის სფერო არ არის, სადაც სასულიერო პირის მიერ შეცდომის შენდობა უნდა ხდებოდეს. საზოგადოებრივი და პოლიტიკური ცხოვრება სხვა სფეროა და მოქალაქემ თავისი წილი პასუხისმგებლობა უნდა იტვირთოს. ამასვე გვასწავლის ქრისტიანული მოძღვრება. კერძოდ, თავისუფალი არჩევანი ღმერთის მიერ არის ბოძებული. ღმერთმა რაც გიბოძა ადამიანს, არა მგონია, იქ გჭირდებოდეს დამხმარე, ეს ეხება სასულიერო პირსაც. ვკითხავ სასულიერო პირს და ის მირჩევს, ეს არის გაქცევა საკუთარი მოვალეობისგან.

არჩევნების შემდეგ შესაძლოა თუ არა „ქართულ ოცნებასთან“ თანამშრომლობა კვლავ გააგრძელოთ?

- კოალიციის მთავარ პარტნიორთან  „ქართულ ოცნებასთან“ ზიგზაგებიანი პროცესი წარიმართა. „ოცნებაში“ იყვნენ მოწადინებული იმისთვის, რომ ეს არჩევნებიც ერთად გაგვევლო. თუმცა, ხანდახან ამაში ეჭვი ეპარებოდათ და ჩვენ ძალიან მკაფიოდ დავსვით საკითხი, ხოლო მარტის განმავლობაში საბოლოო არჩევანი გავაკეთეთ.  როდესაც 2012 წლიდან ამ პროცესში ჩავერთეთ, მაშინ ძალიან კონკრეტული ამოცანები გვქონდა. იმ ამოცანებს მოვახმარეთ ყველაფერი რისი შესაძლებლობაც გვქონდა, თუმცა, ჩვენი შესაძლებლობების გამოვლენის საშუალება არ გვექნებოდა, თუ არა კოალიციური სისტემა და „ქართული ოცნების“ პროექტი, რომელიც იქნა წამოწყებული. ამიტომ, ჩვენ ერთის მხრივ ვაფასებთ ჩვენს პარტნიორებს და მათთან ერთად გაკეთებულ საქმეებს და მეორე მხრივ, „რესპუბლიკურ პარტიას“ პოლიტიკური ცხოვრება არ დაუწყია მმართველ გუნდთან  ერთად და არც მათთან ერთად დაამთავრებს - ჩვენ  ჩვენი გამოკვეთილი გზა გვაქვს. რაც შეეხება მომავალს - ჩვენ ვართ რეალისტები და პოლიტიკაში გამოცდილება იმასაც ნიშნავს, რომ საკუთარი თავის სწორი და ადეკვატური შეფასება უნდა შეგეძლოს. ამიტომ მოსახლეობას არ ვეუბნებით, რომ მარტო ჩვენ ვიქნებით ხელისუფლებაში. პირიქით, ვამბობთ, რომ მოგვეცით ხმები  და „რესპუბლიკური პარტია“ იქნება საჭირო, ეფექტური და სანდო პარტნიორი იმ პოლიტიკური ძალებისთვის, ვისაც პარლამენტში მოვძებნით. ეს იმ ტიპის სახელმწიფოებრივი პოლიტიკური ცხოვრებაა, რომელმაც ევროპაში კეთილდღეობის უმაღლესი დონე უზრუნველყო. ჩვენი პოლიტიკური ბიოგრაფიის ერთი თვალით გადავლებაც კი ძალიან ნათლად მიანიშნებს, რომ გამოცდილება გვაქვს განსხვავებულ პოლიტიკოსებთან და პოლიტიკურ ძალებთან პარტნიორული ურთიერთობის. ვითანამშრომლებთ ყველასთან ერთი პირობით, ჩვენ უნდა გვქონდეს თავისუფალი ევროპული სახელმწიფო, დაფუძნებული ადამიანის თავისუფლებაზე, დამოუკიდებელი რუსული გავლენისგან და ინტეგრირებული ევროატლანტიკურ სივრცეში.  აი, ეს ღირებულებები ვისაც ექნება, არა მარტო პროგრამაში, არამედ ამ ყველაფერს რეალობაშიც გაატარებს, ყველასთან გვექნება ურთიერთობა, მათ შორის „ქართულ ოცნებასთანაც“. ამას იმიტომ ვამბობ, რომ ახლა თავად მმართველ გუნდსაც  საინტერესო პერიოდი უდგას და ვხედავთ,  ცოტა არ იყოს  არათანამიმდევრულ პოლიტიკას. მაგალითად,  კანდიდატთა დასახელებაში და ა.შ. ასე რომ, ჯამურად რა სახეს მიიღებს „ოცნება“  ეს იქნება საინტერესო.

თქვენი წამოსვლის შემდეგ, ხომ არ ფიქრობთ, რომ „ოცნების“ პროდასავლური ფრთა დასუსტდა და რეალურად, არიან თუ არა „ქართულ ოცნებაში“ რუსეთის მომხრე ადამიანები?

- პრორუსული ხალხი კოალიციურ სისტემაში აშკარად იყვნენ და კოალიციური თანაცხოვრების ბოლო ეტაპზე მათ ღიად დაიწყეს საკუთარი პოზიციების გამოხატვა. თუმცა, შემდეგ გაერთიანება დატოვეს. მმართველ გუნდში ახლად მიღებულ ხალხს შორის ვინ ვინ არის,  ნამდვილად არ ვიცი. არა მგონია, პარტიის წინა ხაზზე მყოფებს, იგივე გიორგი კვირიკაშვილს, იმ ხალხს,რომელიც მან საგურამოში წარმოგვიდგინა,  ეს კითხვა  ეკუთვნოდეთ,  მაგრამ პარტია არ არის მხოლოდ ლიდერი, 15, თუ 37 კაცი. შესაძლოა, ამდაგვარი მინარევები იყოს იმიტომ, რომ მმართველი გუნდი მასშტაბურ პროექტს შეეჭიდა და უნდათ, რომ მოსახლეობის ყველა ფენის გული მოიგონ.

4 წლის განმავლობაში რას თვლით ხელისუფლების მთავარ შეცდომად და მთავარ მიღწევად ?

- მთავარი შეცდომა, რომელმაც დაღი დაასვა შემდგომ პოლიტიკურ ცხოვრებას იყო ის, რომ პარლამენტში წარსული მოვლენების სისტემური დანაშაულებების გამოსაძიებლად საგამოძიებო კომისია არ შეიქმნა. მაშინ კოალიციაში იმ აზრმა გაიმარჯვა, რომ ყველაფერი ნათელი ინდივიდუალური დანაშაულებების გამოძიებით გახდებოდა. მაშინ ჩვენი პოზიცია იყო, რომ საჭირო იყო კომპლექსური და მათ შორის, პოლიტიკური შეფასება-  ანუ ვინც დასასჯელი იყო დასჯილიყო და პოლიტიკური პასუხისმგებლობა აეღო და წინსვლა იმ ხალხთან გაგვეგრძელებინა, რომელიც გაემიჯნებოდა და უარს იტყოდა იმ წარსულზე, რაც დაიდებოდა. ამან სასურველი შედეგი ვერ მოგვცა, კონფრონტაციული ურთიერთობები გაგრძელდა ხშირად იმ ხალხთანაც, რომლებიც იმ მომენტში მზად იყვნენ  ცხოვრებაში ახალი ფურცელი გადაეშალათ, მაგრამ ჩვენი არათანმიმდევრული პოლიტიკით, პრაქტიკულად, ბევრი მათგანი კვლავ სააკაშვილთან მივაბრუნეთ.  რაც შეეხება მიღწევას - 2012 წლის მდგომარეობით არავის  სჯეროდა, რომ არჩევნების გზით შეიცვლებოდა ხელისუფლება. ძალიან ბევრი რამ იყო დისკრედიტირებული, მათ შორის ევროპული არჩევანიც და ზოგადად დემოკრატიული ღირებულებებიც, ეს მხოლოდ ფასადად იყო გამოტანილი. ერთი მთავარი მიღწევა არის ის, რომ ქვეყანაში შიში გაქრა.  პოლიტიკური თავისუფლებები უკვე ჩვეულებრივი მოვლენაა და დღეს საქართველოს მოქალაქე იმის მეათედსაც არ აპატიებს ხელისუფლებას, რასაც  წინა ხელისუფლების დროს ითმენდა.

როგორ შეაფასებდით საკონსტიტუცი სასამართლოს ირგვლივ განვითარებულ მოვლენებს და რაში ხედავთ გამოსავალს ?

- საკონსტიტუციო სასამართლოსთან დაკავშირებულ საკითხებში, მგონია, რომ წითელი ხაზები ყველამ გადავლახეთ. აქ ერთადერთ გამოსავალს ვხედავ -  ვითვლი დღეებს სექტემბრამდე, როდესაც სასამართლოში 4 მოსამართლე ამთავრებს თავის ვადას და დაინიშნება 4 ახალი მოსამართლე -  ორი პრეზიდენტის მიერ, ერთი უზენაესი სასამართლოსა და ერთიც პარლამენტის მიერ. თუ ჩვენ შევძლებთ და არა მხოლოდ კარგ იურისტებს, არამედ პრინციპულ და ასეთ ვითარებაში სასამართლოს ინსტიტუტის ჩიხიდან გამოყვანის შემძლე ადამიანებს, მაშინ გამოსწორდება საქმე.  აუცილებლად უახლოეს დღეებში მექნება კონსულტაციები სათანადო პირებთან იმისთვის, რომ პარლამენტს სათანადო უნარ ჩვევებისა და კვალიფიკაციის მქონე ადამიანი შევთავაზო. სამწუხაროდ, მანამდე  რაიმე სერიოზული პოზიტიური ცვლილების რესურს ვერ ვხედავ.

ბოლო დროს საქართველოში პრორუსული ძალები საგრნობლად გააქტიურდნენ. როგორ ფიქრობთ, რით არის ეს ყოველივე განპირობებული?

- თუ შევხედავთ, რა ხდება მსოფლიოში, დავინახავთ რომ ეს არის საკმაოდ გლობალური პროცესის კონკრეტული გამოვლინება და ეს პროცესი დემოკრატიულ ძალებს მეტი კონსოლიდაციისკენ და პასუხისმგებლობისკენ მიგვანიშნებს. ხედავთ რომ ძალიან მყარი და ტრადიციული დემოკრატიის ქვეყნებშიც კი, ულტრამემარჯვენე და მემარცხენა ძალების აღზევებაა. ეს ტალღა საქართველოშიც იგრძნობა და ეს რუსული პროპაგანდის შედეგია. ჩვენ მეტი უნდა ვიმუშაოთ, რომ ამომრჩევლებმა მეტი ინფორმაცია  მიიღონ. მაგალითად, მითი იმის შესახებ, რომ რუსეთი გაამთლიანებდა საქართველოს, თუ ჩვენ ნატოზე უარს ვიტყოდით.  მაქვს ერთი ძალიან მარტივი კითხვა ამ მოსაზრების ლობისტებისთვის - როდის და სად თქვა რუსეთმა რომ თუ საქართველო ნატოში არ შევა, აფხაზეთსა და სამხრეთ ოსეთს დააბრუნებს - ვინმეს ამის მსგავსი სადმე მოუსმენია?! მეორე- როდესაც საუბარია იმაზე, რომ საქართველოსა და ნატო-ს ურთიერთობა პრობლემურია - საქართველოს ტერიტორიაზე ორი სამხედრო ბაზა აქვს და მისი გამალებული აღჭურვა მიდის. რას ეფუძნება ეს ოპტიმიზმი?  ჩვენ მეტი უნდა გავაკეთოთ ამ მიმართულებით და ამ პრობლემას გავუმკლავდეთ. ჩვენ გვაქვს   კომუნისტურ იდეოლოგიასთან დაკავშირებით მკაფიო კანონმდებლობა და ყოველგავრი თამაშები ასეთ თემასთან სახიფათოა და შეიძლება, მთელი ქვეყნისთვის მძიმედ დასრულდეს.

ხარაგაულის ფაქტზე მინდა გკითხოთ, (საკრებულოს რესპუბლიკელი თავმჯდომარის გადადგომის მოთხოვნა, რომელიც ჩავარდა) ქალბატონმა ხათუნა სამნიძემ ეს პოლიტიკურ დევნად შეაფასა - ხომ არ ფიქრობთ, რომ წინასაარჩევნოდ მსგავსი ფაქტები გახშირდება?

- ჩვენ ვართ კონკურენციაში „ქართულ ოცნებასთან“, მათაც დაინახეს, რომ კონკურენციაში არიან „რესპუბლიკურ პარტიასთან“. პარტიული კონკურენცია, სახელმწიფო სტრუქტურებში ჩვენს საქმიანობასთან არ უნდა აგვერიოს. ხარაგაულის ინციდენტი, რომელიც „ოცნებისთვის“ წარუმატებლად დასრულდა, ჩემთვის არ დასრულებულა. იმიტომ, რომ  ერთი მხრივ, მაშფოთებს „ოცნების“ ყველგან და ყველაფრის გაკონტროლების სურვილი და მეორე მხრივ, თვითმართველობის ორგანოებში სხვა პოლიტიკური წარმომადგენლის მიუღებლობა, თან იმ შემთხვევაში, როდესაც ვერც ერთი კონკრეტული პრობლემა ვერ სახელდება. აქ ერთადერთი დამოკიდებულებაა - შენ აღარ ხარ ჩვენი გუნდის წევრი და რატომ უნდა იყო ხელმძღვანელი? ასეთი დამოკიდებულებით ქვეყანას ვავნებთ, ასეთი დამოკიდებულებით შორს ვერ წავალთ. არჩევნებში ხელისუფლება ყველაზე მეტად ვისაც ერჩის, მას აძლიერებს, მაგრამ ეს  სწორი გზიდან გადახვევაა.   არ მინდა სწორი გზიდან გადახვეულ საქართველოში ვიცხოვრო და არჩევნებში წარმატებას მივაღწიო.  მინდა, მეც და სხვასაც წარმატება სწორ გზაზე მიმავალ ქვეყანაში გვქონდეს.

თინა ხიდაშელმა და ლევან ბერძენიშვილმა განაცხადეს რომ პრემიერის გამოსვლებში ბოლშევიკური ტექსტები ჭარბობს. როგორ ფიქრობთ შეესაბამება თუ არა ეს განცხადება სიმართლეს?

- ხარაგაულის ინციდენტზე როცა ვსაუბროდით, ეს განცხადებები უფრო ამ მოვლენას ეხებოდა. სახელმწიფო სისტემაში სხვა პოლიტიკური ძალის წარმომადგენელი მიჩნეულია არასასურველ მოვლენად და გსურს ყველაფერზე ტოტალური კონტროლის დამყარება,  ვეუბნები პარტნიორებს „ქართულ ოცნებაში“.  ნუ ეწყინებათ, თუ რაღაც საკითხებში ჩვენ მკვეთრი და მკაფიო შეფასებები გვექნება. იმიტომ, რომ ბევრმა ასეთმა შეცდომამ ქვეყანა ცუდ შედეგამდე მიიყვანა. ჩვენ მრავალპარტიულობის მომხრე მარტო ევროპაში მოგზაურობისას არ უნდა ვიყოთ და ეს რეალურ ცხოვრებაში უნდა განვახორციელოთ.

გქონდათ თუ არა ბოლო პერიოდში ბიძინა ივანიშვილთან კონსულტაცია და გთავაზობდათ თუ არა ის მხოლოდ თქვენ და არა პარტიას „ქართულ ოცნებაში“ გაწევრიანებას?

- ბატონ ბიძინასთან საკმაოდ დიდი ხანია კონტაქტი აღარ მქონია და ახლა ამის აუცილებლობას ვერ ვხედავ. მას ქონდა გარკვეული ხედვები, თუ როგორ უნდა გაგრძელებულიყო ჩვენი ურთიერთობები, მაგრამ ის მოდელი, ჩემი ღრმა რწმენით, არ იყო  რაიმე დადებითი შედეგის მომტანი. ჩვენ, "რესპუბლიკელები", მზად ვართ სერიოზული პარტნიორობისთვის და ჩვენ ეს საქმითაც, სიტყვითაც დავამტკიცეთ. კოალიციაში იმიტომ არ შევსულვართ, რომ ჩვენი პოზიცია გაგვემყარებინა. ჩვენ იქ შევედით, რომ ქვეყნის პოზიციები გამყარებულიყო. ჩვენ ბევრი რამ ავიტანეთ. ვიცი, რომ „ოცნების“ წარმომადგენლებმაც ჩვენგან ბევრი აიტანეს და ეს კოალიციებში გარდაუვალია. შემდგომი ცხოვრების გაგრძელების ის სქემა მიუღებელი იყო.

ავტორი: ბესო კუნელაური

ავტორი: ექსპრესნიუსი,

სოციალური ქსელები

ლელო: რეჟიმი ცდილობს ბიზნესის ხმა ჩაახშოს, ჩვენ ამ ხმას გავაძლიერებთ

თეთრი სახლი: აშშ ირანის მხრიდან გარკვეულ პროგრესს აღნიშნავს

25 აპრილს, ილია II-ის გარდაცვალებიდან 40 დღე სრულდება - სიონის ტაძარში წირვას აღავლენენ

პოლიციამ ლაზარე გრიგორიადისი დააკავა