სამეთაურო-საშტაბო სწავლება „დიდგორი 2016“ დაიწყო

2016-07-26 21:32:15, 971 ნახვა

სამხედრო

ეროვნულ სასწავლო ცენტრ „კრწანისში“ სამეთაურო-საშტაბო სწავლება „დიდგორი 2016“ დაიწყო.

ოფიციალური ცერემონიალი საქართველოს თავდაცვის მინისტრმა, თინათინ ხიდაშელმა და საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ გახსნეს.

„იმედს გამოვთქვამ, რომ ეს სწავლება შარშანდელზე გაცილებით წარმატებული იქნება. ვიმედოვნებ, რომ ჩვენი კოლეგა უწყებების წარმომადგენლები უფრო აქტიურად მიიღებენ მონაწილეობას, უფრო მეტი შესაძლებლობა გაჩნდება კოორდინაციის, გამოცდილებისა და იმ შედეგის გათვალისწინებით, რაც შარშანდელი სწავლებიდან ყველამ ერთად მივიღეთ. გვქონდა შესაძლებლობა, რომ გვესაუბრა როგორც უშიშროების, ასევე კრიზისების მართვის საბჭოსთან და დარწმუნებული ვარ, რომ წლევანდელი სწავლება გაცილებით უფრო შედეგიანი იქნება“, - განაცხადა თავდაცვის მინისტრმა თინათინ ხიდაშელმა.
გახსნის ცერემონიალს ასევე დაესწრნენ საქართველოს შეიარაღებული ძალების გენერალური შტაბის უფროსის მოადგილეები - პოლკოვნიკი ომარ ბეგოიძე და პოლკოვნიკი ნიკოლოზ აგლაძე, ეროვნულ სასწავლო ცენტრ „კრწანისის“ მეთაური, პოლკოვნიკი გრიგოლ ჭელიძე, სამეთაურო-საშტაბო სწავლების „დიდგორი 2016-ის“ ხელმძღვანელი, პოლკოვნიკი ნიკოლოზ ჯანჯღავა და თავდაცვის სამინისტროს სხვა ხელმძღვანელი პირები.

„დიდგორი 2016“ სამთავრობო უწყებათაშორის სწავლებას წარმოადგენს. სწავლების მიზანი სახელმწიფო ორგანიზაციებს, გენერალურ შტაბსა და სარდლობებს შორის სტრატეგიულ და ოპერატიულ დონეზე ურთიერთგაგებისა და კორდინაციის გაღრმავებაა, მნიშვნელოვანია ასევე, სარდლობების დამოუკიდებლად მუშაობის შესაძლებლობების დადგენა და მართვის ცენტრების მოქმედებების დახვეწა ოპერატიულ სარდლობის დონიდან ეროვნულ დონემდე.

სწავლების სცენარი ომის რეალურ მოვლენებთან მიახლოებულ ვითარებაზეა დამყარებული. წვრთნების დროს თავდაცვითი ოპერაციები ვირტუალური მოწინააღმდეგის მიმართ მოდელირებულ გეოპოლიტიკურ გარემოში განხორციელდება.

„დიდგორი 2016-ის“ სწავლება ერთი კვირის განმავლობაში გაგრძელდება და მასში 700-მდე სამხედრო - ოფიცრები, სერჟანტები და კაპრალები მიიღებენ მონაწილეობას. სწავლებაში ასევე ჩართულია ყველა სამთავრობო უწყების 80-მდე წარმომადგენელი.