პრემიერი: ჩვენ გავათავისუფლეთ ბიზნესი, ხელისუფლების ჩარევისგან გავათავისუფლეთ მედია, სასამართლო, პოლიცია

2016-07-18 21:42:50, 700 ნახვა

საზოგადოება

"ჩვენ გავათავისუფლეთ ბიზნესი, ხელისუფლების ჩარევისგან გავათავისუფლეთ მედია, სასამართლო, პოლიცია" - ამის შესახებ პრემიერ-მინისტრმა გიორგი კვირიკაშვილმა ქუთაისში, იმერეთის რეგიონში “ქართული ოცნების“ მაჟორიტარობის კანდიდატების წარდგენისას განაცხადა.

კვირიკაშვილის შეფასებით, “ქართულ ოცნებას“ არც ერთი ნაბიჯი არ გადაუდგამს მოჩვენებითი ეფექტრის შესაქმნელად და ვინმესთვის თვალის ასახვევად. მან განვლილი 4 წელი შეაფასა და “ქართული ოცნების“ გეგმებზე ისაუბრა.

კვირიკაშვილის თქმით, ქვეყანამ მოიპოვა თავისუფლება და ახლა მას სწრაფი განვითარება სჭირდება, რაც “ქართულ ოცნების“ მიზანია.

“ჩვენ გადავარჩინეთ უამრავი ადამიანი, ყველას მივეცით მკურნალობის საშუალება. მარტო ცე ჰეპატიტის პროგრამამ რამდენი სიცოცხლე იხსნა და რამდენ სასოწარკვეთილ ადამიანს დაუბრუნა სიცოცხლის იმედი. ჩვენ უპრეცედენტო დახმარება გავუწიეთ სოფელს, ფეხზე წამოდგომის საშუალება მივეცით ფერმერებს, მეწარმეებს. ჩვენ ყველა ადამიანს დავუდექით გვერდში, რამდენადაც ეს შესაძლებელი იყო. ჩვენ ხელისუფლება ხალხის სამსახურში ჩავაყენეთ და ასე გავაგრძელებთ მომავალშიც. გაგრძელდება ყველა ის პროგრამა, რომელიც ჩვენ ხალხს ჯერ კიდევ გაჭირვებულ ყოფას შეუმსუბუქებს. ჩვენ რეალურად გავათავისუფლეთ ბიზნესი, ხელისუფლების ჩარევისგან გავათავისუფლეთ მედია, სასამართლო, პოლიცია. დღეს საკუთრების უფლება დაცული და ხელშეუხებელია. ჩვენს ამ წარმატებას აღიარებს ყველა - საერთაშორისო ორგანიზაცია თუ პარტნიორი ქვეყნები, მაგრამ ეს საკმარისი არ არის. ამაზე ვერ შევჩერდებით. ჩვენთვის მთავარია, რომ თქვენ იგრძნოთ უკეთესობა. თითოეული თქვენგანის ოჯახში მოვიდეს კეთილდღეობა. ამ ოთხ წელიწადში ფუნდამენტი ჩავყარეთ და დღეს უკვე თამამად შეგვიძლია შევთავაზოთ ჩვენს ხალხს სიახლე, რაც თითოეული ადამიანის ცხოვრების დონის გაუმჯობესებას გულისხმობს“, - განაცხადა გიორგი კვირიკაშვილმა.