დანაშაულის პრევენციის ცენტრმა მესტიაში სამართლის შესახებ ტრენინგი ჩაატარა

2016-06-24 09:34:30, 668 ნახვა

საზოგადოება

საქართველოს იუსტიციის სამინისტროს მმართველობის სფეროში მოქმედ სსიპ „დანაშაულის პრევენციის ცენტრმა“ მესტიელი ახალგაზრდებისთვის სამართლის შესახებ ოთხდღიანი სემინარები ჩაატარა.

„დანაშაულის პრევენციის ცენტრის“ ინფორმაციით, პროექტში ჩაერთო დაბა მესტიისა და მიმდებარე სოფლების - ლატალის,ლენჯერის, მულახის საჯარო სკოლების 45 მოსწავლე.

მათივე ცნობით, სემინარების თემები ახალგაზრდებმა თავად შეარჩიეს.ტრენინგები მიეძღვნა ადამიანის ძირითად უფლებებსა და თავისუფლებებს, საერთაშორისო კონვენციას, გენდერულ თანასწორობას, სამართლის დარგებს, სისხლის სამართალს, ბავშვთა უფლებებს.

პროექტი სალექციო მეთოდის გარდა,მოიცავდა პრაქტიკულ სამუშაოებსაც; გაიმართა დისკუსია და მოკლემეტრაჟიანი ვიდეორგოლების ჩვენება/განხილვა.

პროექტის დასასრულს ყველა მონაწილეს გადაეცა მონაწილეობის დამადასტურებლი სერტიფიკატი და ასაკობრივად ადაპტირებული წიგნი სამართლის შესახებ - „სამართლის ქალაქი“. კონკურსის შედეგად გამარჯვებულ მონაწილეებს გადაეცათ სსიპ „დანაშაულის პრევენციის ცენტრის“ ბრენდირებული საჩუქრები. შეხვედრები მესტიის იუსტიციის სახლში გაიმართა.

იუსტიციის სამინისტროს სსიპ „დანაშაულის პრევენციის ცენტრი" სხვადასხვა ახალგაზრდულ პროგრამას ახორციელებს. მათი ერთ-ერთი მთავარი მიზანია მოზარდებში სამართლებრივი ცნობიერების ამაღლება, სამოქალაქო საზოგადოების გაძლიერება, პიროვნული განვითარების ხელშეწყობა.