ლეგენდარული ბალერინა ვერა წიგნაძე გარდაიცვალა

2016-06-17 23:03:41, 4573 ნახვა

კულტურა

ვახტანგ ჭაბუკიანის უცვლელი პარტნიორი, საქართველოს სახალხო არტისტი, ლეგენდარული ბალერინა ვერა წიგნაძე 92 წლის ასაკაში გარდაიცვალა.

ვერა ვარლამის ასული წიგნაძე 1924 წლის 24 სექტემბერს ბაქოში დაიბადა. მას საქართველოს სახალხო არტისტის წოდება 1955 წელს მიენიჭა. წიგნაძემ 1943 წელს დაამთავრა ბაქოს ქორეოგრაფიული სასწავლებელი, 1943-1946 წლებში ცეკვავდა ახუნდოვის სახელობის ოპერისა და ბალეტის თეტრში. 1946 წლიდან თბილისის ოპერისა და ბალეტის თეატრის წამყვანი მოცეკვავე გახდა.

946 წლიდან ვერა წიგნაძე თბილისის ოპერისა და ბალეტის წამყვანი მოცეკვავე გახდა. ეს იყო იშვიათი შემთხვევა, როცა დებიუტანტი კორდებალეტში არ დააყენეს და თავიდანვე მთავარი პარტიების შესრულება შესთავაზეს.

ჟიზელი (ადანის "ჟიზელი"), ლაურენსია (კრეინის "ლაურენსია"), ოდეტა-ოდილია (ჩაიკოვსკის "გედის ტბა"), ნიკია (მინკუსის "ბაიადერა"), ავრორა (ჩაიკოვსკის "მძინარე მზეთუნახავი"), ტაო-ხოა (გლიერის "წითელი ყაყაჩო"), ეს არასრული სიაა იმ პარტიებისა, რომლებიც ვერა წიგნაძემ ვახტანგ ჭაბუკიანის დასში შეასრულა.

წიგნაძე, თავისი შეუდარებელი ტექნიკით, ბრწყინვალე ფუეტეთი, მსუბუქი ნახტომითა და ჰაეროვანი პლასტიკით, ჭაბუკიანისთვის უფრო მეტი იყო, ვიდრე პარტნიორი. მათ თავიდანვე კარგად გაუგეს ერთმანეთს.

თბილისის ოპერისა და ბალეტის თეატრთან არის დაკავშირებული თითქმის მისი მთელი ცხოვრება, ამ თეატრის სცენაზე 3 ათეული წელი იცეკვა, შემდეგ კი პედაგოგიურ საქმიანობას მიჰყო ხელი. ლეგენდარული ვერა წიგნაძე ახალგაზრდობის და სტუდენტთა ბუდაპეშტის საერთაშორისო ფესტივალის ლაურეატია.