ირაკლი ღარიბაშვილმა ევროკომისიის პრეზიდენტი საქართველოში მოიწვია

2015-02-27 10:04:55, 341 ნახვა

პოლიტიკა

საქართველოს პრემიერ-მინისტრმა ევროკომისიის პრეზიდენტი საქართველოში მოიწვია. ირაკლი ღარიბაშვილი ჟან-კლოდ იუნკერს ბრიუსელში ვიზიტის ფარგლებში შეხვდა.

მხარეებმა საქართველო-ევროკავშირის ასოცირების დღის წესრიგით გათვალისწინებული რეფორმები, ვიზის ლიბერალიზაციის მიმართულებით რიგის სამიტთან დაკავშირებული მოლოდინები და რეგიონში არსებული ვითარება განიხილეს.

საქართველოს მთავრობის მეთაურმა ევროკომისიის პრეზიდენტს კიდევ ერთხელ დაუდასტურა, რომ საქართველოს ევროპული არჩევანი შეუქცევადია და ასოცირების ხელშეკრულება საქართველო-ევროკავშირის ურთიერთობებში საბოლოო მიზანი არ არის.

მხარეებმა ასევე ისაუბრეს საქართველოს ოკუპირებულ ტერიტორიებზე განვითარებულ მოვლენებზე და რუსეთის მიერ აფხაზეთისა და ცხინვალის საოკუპაციო რეჟიმებთან ე.წ შეთანხმებების გაფორმება კიდევ ერთხელ დაგმეს.

საუბარი შეეხო უკრაინაში განვითარებულ მოვლენებს და რეგიონულ უსაფრთხოებას. პრემიერმა შეშფოთება გამოთქვა უკრაინის კრიზისთან დაკავშირებით და აღნიშნა, რომ რუსეთის მსგავსი ქმედებები ევროპის კონტინენტზე უსაფრთხოებასთან დაკავშირებულ მდგომარეობას ამძიმებს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან