დავით კირკიტაძე: ბრალი სასაცილოდ არ მყოფნის

2015-02-23 16:00:03, 378 ნახვა

პოლიტიკა

ქვემო ქართლის ყოფილი გუბერნატორი დავით კირკიტაძე აცხადებს, რომ წაყენებული ბრალი სასაცილოდაც არ ყოფნის.
როგორც კირკიტაძემ "რუსთავი2"-თან სატელეფონო საუბარში აღნიშნა, მის მიმართ პოლიტიკური დევნა ხორციელდება.
კირკიტაძის განმარტებით, 2011 წლის შემდეგ საქართველოში იმყოფებოდა და ქვეყანა დიდი ხნით არ დაუტოვებია, 4 იანვარს კი, ის საზღვარგარეთ სასწავლებლად წავიდა და სასწავლო კურსის დასრულებამდე ჩამოსვლას ვერ ახერხებს.
"ეს არის პოლიტიკური დევნა, იქედან გამომდინარე, რომ 2011 წლიდან 2015 წლის 4 იანვრამდე ვიყავი ქვეყანაში და ვცდილობდი ქვეყანა დიდხანს არ დამეტოვებინა და თუ რამე კითხვები ჰქონდა გამოძიებას, მზად ვიყავი მეპასუხა.4 იანვარს თბილისის აეროპორტიდან წამოვედი სასწავლებლად. ეს კარგად იციან. 6 თვეში მთავრდება კურსი და ვერ ვახერხებ საქართველოში ჩამოსვლას, დრო იხელთეს და ბრალი წამიყენეს.10 ივლისს მიმთავრდება სწავლა და ვაპირებ ქვეყანაში დაბრუნებას და ყველა კითხვაზე მზად ვარ პასუხი გავცე.რაც შეეხება ბრალს, სასაცილოდაც არ მყოფნის. ნამდვილად არ ვაპირებ ჩემი გეგმების შეცვლას იმის მიხედვით, თუ რას მოისურვებს რუსი ოლიგარქი, რომელსაც ქვეყანა მიჰყავს უფსკრულისკენ",-განაცხადა დავით კირკიტაძემ.
ქვემო ქართლის ყოფილი გუბერნატორი, დავით კირკიტაძე ფინანსთა სამინისტროს საგამოძიებო სამსახურმა პასუხისგებაში მისცა. მას სამსახურებრივი უფლებამოსილების ბოროტად გამოყენება ედება ბრალად.
გამოძიების თანახმად, საქმე ეხება 2011-2012 წლებში მომხდარ ფაქტს. "დავით კირკიტაძის მითითებით, ქვემო ქართლის გუბერნიის კუთვნილმა სპეც-ტექნიკამ, საქართველოს კანონმდებლობის დარღვევით, უსასყიდლოდ შეასრულა სამუშაოები დავით კირკიტაძის ძმის, ირაკლი კირკიტაძისა და ყოფილი საჯარო მოხელის, გიორგი უდესიანის ერთობლივი კომპანიების, შპს „ავტოჰაუს-რუსთავი 2011-ისა" და შპს „ტიტანი 2011-ის" მიერ, თბილისი-რუსთავის გზატკეცილზე ავტობაზრობის მშენებლობის დროს, რითაც სახელწიფოს მიადგა 248 ათას 400 ლარის მატერიალური ზიანი",-განმარტავენ საგამოძიებო უწყებაში.