ნატოს კვირეულის ფარგლებში, ვაზიანში IV მექანიზირებული ბრიგადის სამხედრო ბაზაზე მედიის წარმომადგენლებისთვის პროექტი "ერთი დღე ჯარში" გაიმართა. პროექტში სხვადასხვა ტელევიზიებისა და სააგენტოების ჟურნალისტებმა მიიღეს მონაწილეობა.

პირველ დღეს ბრიგადის ხლმძღვანელობამ ჟურნალისტებს სამხედრო ბაზაზე არსებული უსაფრთხოების წესები გააცნეს. რეპორტიორებმა ასევე მოისმინეს IV მექანიზირებული ბრიგადის ისტორია და ადგილზე არსებულ ვითარებას გაეცნენ. მოგვიანებით წვრთებისა და შეფასების ერთობლივი სასწავლო ცენტრის (JTEC), გუნდის ხელმძღვანელმა, კრისტიან ემაუსმა მედიის წარმომადგენლებს ნატო-საქართველოს საწვრთნელი ცენტრის შესახებ ლექცია ჩაუტარა. ლექციის ბოლოს შეხვედრა კითხვა-პასუხის რეჟიმში გაგრძელდა.

სტუმრებისთვის მეორე დღე ჯარისკაცებთან ერთად დილის გამამხნევებელი ვარჯიშით დაიწყო, რის შემდეგაც ჟურნალისტები სამხედრო მოსამსახურეებთან ერთად სასაუზმოდ გაემგზავრნენ. 
საუზმის შემდეგ ჟურნალისტებმა საერთო მოწყობაში მიიღეს მონაწილეობა და დღის წესრიგთან დაკავშირებით ბრიგადის მეთაურისგან უშუალოდ მიიღეს მითითება.

IV მექანიზირებული ბრიგადის ხელმძღვანელობამ პროექტის მონაწილეებს ნატო-ს შესახებ ლექცია ჩაუტარა. ლექციის თემები იყო ნატო-ს ისტორია, ალიანსის როლი დღევანდელ რეალობაში და მისი სტრუქტურა.

მედიასაშუალებების წარმომადგენლებისთვის ყველაზე აქტიური და საინტერესო ღონისძიებები დღის მეორე ნახევარში დაიწყო. ჟურნალისტებმა სიმულაციურ ცენტრში სხვადასხვა სახის სასწავლო ავტომატური შაშხანები და ტანკსაწინააღმდეგო ჭურვები გამოსცადეს.

რეპორტიორები IV მექანიზირებული ბრიგადის ხელმძღვანელობასთან ერთად ვაზიანის სასროლეთისკენაც გაემგზავრნენ. სასროლეთზე სასწავლო წერტილის ხელმძღვანელმა ჟურნალისტებს ავტომატური ცეცხლსასროლი შაშხანის, M4-ის დაშლა-აწყობა და გამოყენების წესები აუხსნა. მოგვიანებით ისინი ვაზიანის სასროლეთის სხვა სექტორში დისლოცირდნენ. ჟურნალისტები გაეცნენ საარტილერიო თვითმავალ 2C1-ის საველე სწავლებას. რეპორტიორები ასევე გაეცნენ T-72-ის ტიპის ტანკის უშუალო მოქმედებას ოპერაციის რაიონში, რაც მოიცავდა სექტორის დაკავებას და თავდაცვისთვის მომზადებას.
დღის ბოლოს მედიის წარმომადგენლებს, ქართველ სამხედრო მოსამსახურეებთან ერთად ჩაუტარდათ ფიზიკური მომზადება. მიუხედავად დატვირთვისა, ჟურნალისტებმა მათზე დაკისრებული ყველა გამოცდა წარმატებით ჩააბარეს.

პროექტის დასასრულს, IV მექანიზირებული ბრიგადის მეთაური, ვიცე-პოლკოვნიკი ზურაბ ხვიჩია რეპორიორებს გაესაუბრა. ვიცე-პოლკოვნიკმა მადლობა გადაუხადა ჟურნალისტებს პროექტში მონაწილეობისათვის და წარმატებები უსურვა.

ნატოს კვირეული საქართველოში მეცხრედ ტარდება. ღონისძიება სსიპ "ნატოსა და ევროკავშირის შესახებ საინფორმაციო ცენტრის" ორგანიზებით და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის, საქართველოს თავდაცვის სამინისტროს, საქართველოში ნატო-ს სამეკავშირეო ოფისის და საქართველოში რუმინეთის საელჩოს მხარდაჭერით ხორციელდება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

უკრაინაში კიდევ ერთი ქართველი მებრძოლი ბაჩო ბებია დაიღუპა

კალასი: საქართველო დემოკრატიის უკუსვლიდან შემობრუნების არანაირ ნიშანს არ აჩვენებს

ზელენსკის თქმით, დრუჟბას ნავთობსადენი ოპერაციების განახლებისთვის მზადაა

იოზვიაკი წერს, რა განიხილეს EU-ის მინისტრებმა დღევანდელ შეხვედრაზე საქართველოზე