„ქართული ოცნების“ მთავრობა ოკუპირებული ტერიტორიებიდან დევნილი ოჯახებისთვის ახალ პროგრამას აანონსებს - ბინისა და „სოფლად სახლის“ პროგრამის პარალელურად, ბინის ნაცვლად ფულადი კომპენსაციის მიღების შესაძლებლობას.

„კომპენსაციის ოდენობა იქნება 10 000 ლარი დევნილი ოჯახის თითოეულ წევრზე“, - განაცხადა ირაკლი კობახიძემ 12 ოქტომბერს მთავრობის ადმინისტრაციაში ბრიფინგზე.

მისი თქმით, თითოეულ ოჯახს, რომელსაც სახელმწიფოსგან არ აქვს მიღებული საცხოვრისი ან კომპენსაცია, ექნება უფლება, სამინისტროს შესაბამის სააგენტოში შეიტანოს განაცხადი „საცხოვრისის ნაცვლად ფულადი კომპენსაციის მიღების შესახებ“.

მისი ცნობით, პროგრამისთვის „წელს გამოიყოფა 58 მილიონი ლარი“:

„ეს პროგრამა მომავალშიც გაგრძელდება და ბიუჯეტი გაიზრდება“, - თქვა მან.

პარალელურად კი გაგრძელდება „სოფლად სახლის“ პროგრამა და კორპუსების მშენებლობა.  

პრემიერმა ასევე თქვა, რომ დევნილთა განსახლების პროგრამის ბიუჯეტი 2012 წელთან შედარებით 10-ჯერაა გაზრდილი: „შედეგად, 45 ათასზე მეტ დევნილ ოჯახს საკუთრებაში გადაეცა ახალი, კეთილმოწყობილი საცხოვრისი“. „სოფლად სახლის“ პროგრამის ფარგლებში კი, კობახიძის თქმით, 2026 წელს 2000-მდე ოჯახმა შეძლო სახელმწიფოს მხარდაჭერით სოფლად სახლის შეძენა. მიმდინარე მშენებლობების დასრულების შემდეგ, ახალი ბინები დამატებით 2 600 დევნილ ოჯახს გადაეცემა“, - თქვა მან.

ავტორი: ელენე გვიმრაძე, ექსპრესნიუსის რეპორტიორი 2018 წლიდან

სოციალური ქსელები

ტრამპმა რუსეთის წინააღმდეგ სანქციების შეჩერების გადაწყვეტილება მთელი მსოფლიოსთვის სასარგებლოდ შეაფასა

რუბიო: უკრაინას ჯერ არ აქვს წვდომა Starshield-ის სამხედრო სისტემაზე

აშშ-ის ვიცე-პრეზიდენტმა საფრანგეთში მიმდინარე არეულობა დასავლეთის ქვეყნების საიმიგრაციო პოლიტიკას დაუკავშირა

Z-ბლოგერებმა უარყვეს რუსეთის გენერალური შტაბის მტკიცება, რომ მათ დონეცკის ოლქის ერთ-ერთი მნიშვნელოვანი ქალაქი დაიკავეს