„ასოშიეითედ პრესი“ იტყობინება, რომ რესპუბლიკური და დემოკრატიული პარტიების ექვსმა ამერიკელმა სენატორმა პრეზიდენტ დონალდ ტრამპის ადმინისტრაციას მოუწოდა, დაუყოვნებლივ უარი თქვას რუსეთიდან დიზელის საწვავის შესყიდვის გეგმაზე.

ისინი მიიჩნევენ, რომ ასეთი მიწოდება დაარღვევს აშშ-ის კანონმდებლობას და ფინანსურ მხარდაჭერას გაუწევს მოსკოვს უკრაინის წინააღმდეგ მიმდინარე ომის ფონზე.

კვირას გამოქვეყნებულ ერთობლივ განცხადებაში კანონმდებლებმა ხაზგასმით აღნიშნეს, რომ რუსეთი „აგრძელებს უკრაინაში მშვიდობიანი მოსახლეობის მკვლელობას“ და მოუწოდეს თეთრ სახლს გადახედოს ამ საკითხს. ისინი ასევე აცხადებენ, რომ ადმინისტრაციამ არ გაიარა კონსულტაცია კონგრესთან და არ წარმოადგინა თავისი ქმედებების კანონიერად მოთხოვნილი დასაბუთება.

ტრამპმა პარასკევს, რუსეთის პრეზიდენტ ვლადიმერ პუტინთან სატელეფონო საუბრის შემდეგ, გამოაცხადა რუსული დიზელის მიწოდების შესახებ მოლაპარაკების განზრახვა. ამერიკელი ლიდერის თქმით, რუსეთი დაუყოვნებლივ მიაწვდის 300 000 ტონაზე მეტ საწვავს აშშ-სა და საერთაშორისო ბაზრებს. ნოემბერში დამატებით 500 000 ტონას, შემდეგ 1 მილიონ ტონას და მოგვიანებით კიდევ 3 მილიონ ტონას ელოდებიან.

შეთანხმების საწინააღმდეგო განცხადებას ხელი მოაწერა ოთხმა რესპუბლიკელმა - სიუზან კოლინსმა, ლიზა მურკოვსკიმ, თომ ტილისმა და ჯონ კურტისმა - ასევე ორმა დემოკრატმა - ჯინ შაჰინმა და რიჩარდ ბლუმენტალმა.

კვირას, ტილისმა NBC-ის ეთერში განაცხადა, რომ გეგმის განხორციელებამ შესაძლოა კითხვები გააჩინოს პრეზიდენტის მიერ კანონის დაცვასთან დაკავშირებით. მან ხაზგასმით აღნიშნა, რომ რუსეთი აგრესორია და შეუძლია ომის დასრულება ოკუპირებული ტერიტორიებიდან ჯარების გაყვანით.

სენატორებმა გაიხსენეს, რომ 2022 წელს კონგრესმა აკრძალა რუსული ენერგორესურსების იმპორტი, რათა ამერიკული შესყიდვები ომის დაფინანსებას არ მისცეთ საშუალება. გარდა ამისა, რამდენიმე კვირის წინ კანონმდებლებმა მიიღეს კანონი, რომელიც მნიშვნელოვან ტარიფებს აწესებს რუსული ნავთობისა და ბუნებრივი აირის უმსხვილეს მყიდველებზე, გარკვეული ქვეყნებისთვის შეზღუდული გამონაკლისებით.

ამასობაში, რესპუბლიკელმა ჯონ ბარასომ განაცხადა, რომ ტრამპი ცდილობს შეამციროს ამერიკელების ენერგო ხარჯები და იძულებულია რთული გადაწყვეტილებები მიიღოს. ამავდროულად, სენატორმა მოუწოდა აშშ-ის პრეზიდენტს, გამოიყენოს კანონით გათვალისწინებული სანქციები, როგორც ბერკეტი პუტინის წინააღმდეგ, გრძელვადიანი შეთანხმების მისაღწევად.

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან

სოციალური ქსელები

საფრანგეთის ქალაქ ლიმოჟში, არეულობის დროს ხანძრის შედეგად, მე-19 საუკუნის მერიის კოშკი ჩამოინგრა

„ლინდსი შოკირებული იქნებოდა“ - რესპუბლიკელები ტრამპს რუსეთისთვის სანქციების შესახებ გადაწყვეტილების გამო აკრიტიკებენ

კობახიძე მედიას ცენზურას აქტიურად აგრძელებს და მედიასაშუალებებს სამართლებრივი დევნით ემუქრება

ქართული ოცნება – ივანიშვილმა შეაჯამა წარსულში გუნდში არსებული კორუფციული გამოწვევები და აღნიშნა, რომ პრემიერის, გუნდისა და ძალოვანი სისტემის ეფექტური მუშაობა