ბრიტანეთის მიერ სანქცირებული ნიკოლოზ მჟავანაძე, - პრო-რუსული ორიენტაციის მქონე ჟურნალისტი და პოლიტიკოსი, - აცხადებს, რომ სანქცირება „მთლად სახუმაროც არ ყოფილა“ და მას „საქართველოში მოღვაწეობის უფლება წაერთვა“.

Sezon TV-ის ყოფილი წამყვანი ნიკოლოზ მჟავანაძე, რომელიც მრავალი თვეა, ბელარუსში იმყოფება, სანქცირებიდან 5 დღეში, 6 ოქტომბერს ფეისბუკზე გამოქვეყნებულ ვიდეოში ამბობს:

„ვიღაცეებმა, - თავიდან მეც, - ცოტა ისე, იუმორით გავატარეთ ეს ყველაფერი. მაგრამ მთლად სახუმაროც არ არის, მეგობრებო, ეს სანქცია“.

„ფაქტობრივად, მე საქართველოში მოღვაწეობის უფლება წართმეული მაქვს. ვერცერთი ბანკი მე ვერ მომემსახურება“, - თქვა მან.

„ადამიანს, რომელსაც რაიმე სამსახური აქვს, ხელფასი უნდა აიღოს ან გარკვეული ჰონორარი უნდა აიღოს, ან ფული უნდა ჩაურიცხოს ვიღაცამ, ვერცერთი ბანკი ვერ მომემსახურება საქართველოში“, - განაცხადა მჟავანაძემ.

მისი თქმითვე, აქვს მოლოდინი, რომ სოციალური ქსელებიც, - მათ შორის იუტუბი, სადაც მონეტიზაცია ახალი ჩართული ჰქონდა, გაეთიშება უახლოეს მომავალში - „დროის ამბავია ეს ყველაფერი“.

იგი აკრიტიკებს საქართველოს ხელისუფლებასაც და მათ მიმართავს: „თავს რომ იწონებთ იმითი, რომ ჩვენ დამოუკიდებლები ვართ და გავლენებისგან განთავისუფლდითო! შენს მოქალაქეს დიდი ბრიტანეთი ასანქცირებს და საქართველოში ყველაფერი, - ბანკი იქნება, მიკროსაფინანსო იქნება, ექვემდებარება ბრიტანეთს?! გეკითხებით, ჩვენ ვართ თუ არა დამოუკიდებელი სახელმწიფო“?!

„მთელი მოსახლეობა რომ დაასანქციროს, ესე იგი ფული ვერ უნდა აიღოს ადამიანმა“? - იკითხა მან.

მჟავანაძის შეფასებით, სანქციები არის „სადამსჯელო ოპერაცია იმ ადამიანების მიმართ, რომლებიც მათ სასურველ პოლიტიკას არ ატარებენ“.

„ერთი წლის წინანდელი [რის გამოც სანქციები დაწესდა] ახლა რატომ გაიხსენეს, ეს არის გაუგებარი“, - თქვა მან და სანქცირება დაუკავშირა აზერბაიჯანს, თავის პოზიციებს აზერბაიჯანის წინააღმდეგ, თუმცა ამ მოსაზრების რაიმე დამადასტურებელი ფაქტობრივი გარემოება არ უთქვამს.

ავტორი: ელენე გვიმრაძე, ექსპრესნიუსის რეპორტიორი 2018 წლიდან

სოციალური ქსელები

პოლონეთმა სამხედრო თვითმფრინავები დასავლეთ უკრაინაზე რუსეთის თავდასხმების ფონზე აფრინდა

ტრამპმა ევროპას შესთავაზა, რუსული გაზის შესყიდვას დაუბრუნდეს

ფრანსუა ოლანდმა საფრანგეთის ხელისუფლებას მოუწოდა, ახალგაზრდებთან და პროფკავშირებთან მოლაპარაკებები დაიწყოს

ჩხუბისას თბილისში ორი პირი დაჭრეს- პოლიციამ სამი პირი დააკავა