გერმანიის კანცლერმა ფრიდრიხ მერცმა რუსეთის პრეზიდენტ ვლადიმერ პუტინს მოუწოდა, დაასრულოს ომი უკრაინის წინააღმდეგ და გამოხატოს მოლაპარაკების სურვილი. ეს მოწოდება მან კვირას, კიევში ვიზიტის დროს გააკეთა, იტყობინება dpa.

„ბატონო პუტინ, შეწყვიტეთ ეს უაზრო ომი! ჩვენ მზად ვართ მოლაპარაკებისთვის, მზად ვართ ვესაუბროთ ერთმანეთს ამ ომის დასრულების შესახებ. მაგრამ უკრაინის მშვიდობიან მოსახლეობაზე ეს ბარბაროსული თავდასხმები უნდა შეწყდეს“, - თქვა მერცმა.

კანცლერმა უკრაინის პრეზიდენტ ვოლოდიმირ ზელენსკისთან ერთად უკრაინის მეცნიერებათა ეროვნული აკადემია მოინახულა, რომელიც დრონის დარტყმის შედეგად დაზიანდა. მერცის კიევში ვიზიტის დროს რამდენჯერმე გაისმა საჰაერო თავდასხმის სირენები. კვირას, უფრო ადრე, უკრაინის დედაქალაქის ჩრდილოეთით ხიდი დაზიანდა.

მეცნიერებათა აკადემიის დანგრეული შენობის ადგილას გამოსვლისას მერცმა განაცხადა, რომ მისი აზრით, ასეთი თავდასხმები ომის უაზრობაზე მეტყველებს. მან აღნიშნა, რომ აკადემიაზე დარტყმა კიევის ცენტრში, გერმანიის საელჩოდან სულ რაღაც რამდენიმე ასეულ მეტრში მოხდა.

„დღეს დილით, მშვიდ კვირა დღეს, კიევში კვლავ გაისმა საჰაერო თავდასხმის სირენების სიგნალი. ეს არის ომის დანაშაულები, რომლებიც აქ ყოველდღიურად ხდება“, - განაცხადა კანცლერმა.

მერცის თქმით, რუსეთი ყოველდღიურად აგრძელებს უკრაინის ინფრასტრუქტურაზე დარტყმებს, რადგან ქვეყანა ზამთრისთვის ემზადება.

„ჩვენ შეგვიძლია ვისაუბროთ, მაგრამ მხოლოდ მაშინ, როდესაც იარაღი გაჩუმდება - და იარაღი უნდა გაჩუმდეს“, - განაცხადა კანცლერმა და კიდევ ერთხელ მოუწოდა რუსეთის ხელმძღვანელობას ომის დასრულებისკენ.

უკრაინის მეცნიერებათა ეროვნული აკადემიის შენობას დღის საათებში დრონი დაესხა თავს. დარტყმამ და შემდგომმა ხანძარმა ისტორიული შენობის ორი სართული გაანადგურა. ერთი ქალი დაიღუპა და დაახლოებით ექვსი ადამიანი დაშავდა.

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან

სოციალური ქსელები

საფრანგეთის ქალაქ ლიმოჟში, არეულობის დროს ხანძრის შედეგად, მე-19 საუკუნის მერიის კოშკი ჩამოინგრა

„ლინდსი შოკირებული იქნებოდა“ - რესპუბლიკელები ტრამპს რუსეთისთვის სანქციების შესახებ გადაწყვეტილების გამო აკრიტიკებენ

კობახიძე მედიას ცენზურას აქტიურად აგრძელებს და მედიასაშუალებებს სამართლებრივი დევნით ემუქრება

ქართული ოცნება – ივანიშვილმა შეაჯამა წარსულში გუნდში არსებული კორუფციული გამოწვევები და აღნიშნა, რომ პრემიერის, გუნდისა და ძალოვანი სისტემის ეფექტური მუშაობა