კომუნიკაციების კომისია კვლავ ჩაერია ტელევიზიების სარედაქციო დამოუკიდებლობაში „ფორმულა" „მაუწყებლობის შესახებ" საქართველოს კანონის დარღვევის გამო 10,000 ლარით დააჯარიმა.

კომუნიკაციების კომისიამ, 14 სექტემბრიდან 16 სექტემბრის პერიოდში, მონიტორინგი ჩაატარა, რომლის შედეგადაც, „ფორმულას" 17-საათიან ახალი ამბების პროგრამებში წამყვანებისა და კორესპონდენტების მხრიდან, კომუნიკაციების კომისიის აზრით, პირადი მოსაზრებების გავრცელებისა და მიუკერძოებლობის კანონით დადგენილი მოთხოვნების დარღვევის ფაქტები გამოიკვეთა.

"კომისიის მიერ გამოვლენილი დარღვევები მოიცავდა ახალი ამბების პროგრამებში კორესპონდენტებისა და წამყვანების მიერ გაკეთებულ შეფასებებს, რომლებიც მიმდინარე პოლიტიკური და საზოგადოებრივი საკითხების მაუწყებლის პირადი დამოკიდებულების საფუძველზე გაშუქებას წარმოადგენდა, რასაც კანონმდებლობა ზღუდავს. კერძოდ: „მაუწყებლობის შესახებ" საქართველოს კანონით აკრძალულია ახალი ამბებისა და საზოგადოებრივ-პოლიტიკური პროგრამების პირადი დამოკიდებულების ან მოსაზრების საფუძველზე გაშუქება. იკრძალება მაუწყებლის მიერ ახალი ამბებისა და საზოგადოებრივ-პოლიტიკურ პროგრამაში პოლიტიკური ან სხვა სახის დაპირისპირების ამსახველი ინფორმაციის ან საჯარო პოლიტიკის მიმდინარე საკითხების გაშუქება მაუწყებლის პირადი დამოკიდებულების ან მოსაზრების საფუძველზე. შესაბამისად, შეზღუდულია არა მხოლოდ მაუწყებლის პოზიციის გამოხატვა, არამედ - მაუწყებლის პოზიციის შესაბამისად, პოლიტიკური ან სხვა სახის დაპირისპირების და საჯარო პოლიტიკის მიმდინარე საკითხების გაშუქება.

გამომდინარე იქიდან, რომ ტელეკომპანია „ფორმულას" ბოლო ერთი წლის განმავლობაში მსგავსი ხასიათის დარღვევისთვის უკვე მიღებული აქვს სამი სანქცია: წერილობითი გაფრთხილება, 2,500 და 5,000-ლარიანი ჯარიმები, ამ ჯერზე „მაუწყებლობის შესახებ" საქართველოს კანონის თანახმად, მაუწყებელს უნდა დაეკისროს ჯარიმა არაუმეტეს მისი წლიური შემოსავლის 3%-ისა, ან არანაკლებ 10,000 ლარის ოდენობისა. - წერია კომისიის ინფორმაციაში.

სარედაქციო დამოუკიდებლობის დარღვევა უშუალოდ და პირდაპირ კავშირშია საქართველოს კონსტიტუციის მე-17 მუხლთან, რომელიც იცავს აზრის, გამოხატვისა და მედიის თავისუფლებას. 

კონსტიტუციურ დონეზე სარედაქციო დამოუკიდებლობის ხელყოფა განიხილება, როგორც გამოხატვის თავისუფლებისა და ცენზურის აკრძალვის პრინციპების დარღვევა. 

ძირითადი კონსტიტუციური და საკანონმდებლო ჩარჩო:

• საქართველოს კონსტიტუციის მე-17 მუხლი (აზრის, გამოხატვისა და მასობრივი ინფორმაციის საშუალებათა თავისუფლება):
  • ამ მუხლის მე-2 პუნქტის თანახმად, ყოველი ადამიანის უფლებაა თავისუფლად მიიღოს და გაავრცელოს ინფორმაცია.
  • მუხლის მე-3 პუნქტი პირდაპირ ადგენს: „მასობრივი ინფორმაციის საშუალებები თავისუფალია. ცენზურა დაუშვებელია“. სარედაქციო დამოუკიდებლობაში გარეშე პირების (სახელმწიფოს, მფლობელის ან სხვა ინტერესთა ჯგუფების) ჩარევა და შინაარსის კონტროლი სამართლებრივად სწორედ ცენზურად ფასდება.
  • მე-5 პუნქტი კი კრძალავს მასობრივი ინფორმაციის საშუალებების ან მათი გავრცელების უფლების მონოპოლიზაციას. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პოლონეთმა სამხედრო თვითმფრინავები დასავლეთ უკრაინაზე რუსეთის თავდასხმების ფონზე აფრინდა

ტრამპმა ევროპას შესთავაზა, რუსული გაზის შესყიდვას დაუბრუნდეს

ფრანსუა ოლანდმა საფრანგეთის ხელისუფლებას მოუწოდა, ახალგაზრდებთან და პროფკავშირებთან მოლაპარაკებები დაიწყოს

ჩხუბისას თბილისში ორი პირი დაჭრეს- პოლიციამ სამი პირი დააკავა