2026-08-29 23:25:39, 248 ნახვა

---

გერმანია გეგმავს რუსეთის დადანაშაულებას ლაიფციგში ტერორისტული თავდასხმის დაგეგმვაში და „ფართომასშტაბიანი სანქციების“ დაწესებას

გერმანიის კანცლერი ფრიდრიხ მერცი ემზადება, ლაიფციგ/ჰალეს აეროპორტში დრონით თავდასხმის მცდელობაში რუსეთი დაადანაშაულოს და რუსეთის წინააღმდეგ „ფართო სანქციები“ გამოაცხადოს. ამის შესახებ Politico-მ და Welt am Sonntag-მა სიტუაციის მცოდნე სამ ოფიციალურ პირზე დაყრდნობით გაავრცელეს ინფორმაცია.

ორი მათგანის თქმით, განცხადება მომავალი კვირის დასაწყისშია მოსალოდნელი და შესაძლოა, ირლანდიაში ევროკავშირის საგარეო საქმეთა მინისტრების არაფორმალურ შეხვედრას დაემთხვეს. ერთ-ერთმა წყარომ განაცხადა, რომ ლაიფციგის ინციდენტის შემდეგ, ცალკეული რუსი დიპლომატების გაძევება ან ბერლინში რუსეთის სახლის დახურვა აღარ არის საკმარისი. საჭიროა უფრო მკაცრი ზომები, მათ შორის სანქციების გამკაცრება და უკრაინისთვის იარაღის მიწოდების გაფართოება.

4 აგვისტოს, ლაიფციგ/ჰალეს აეროპორტში ასაფეთქებელი ნივთიერებებით დატვირთული დრონი აღმოაჩინეს. ის უკრაინული სამხედრო სატრანსპორტო თვითმფრინავის მახლობლად იპოვეს, რომელიც სამხედრო ტვირთის გადასაზიდად გამოიყენებოდა. გამომძიებლები ვარაუდობენ, რომ დრონი თვითმფრინავზე თავდასხმისთვის იყო განკუთვნილი. გერმანელმა გამომძიებლებმა მოგვიანებით აეროპორტის მახლობლად კიდევ ერთი დრონი იპოვეს, ხოლო მეორე დღეს, დაახლოებით 50 გრამი ასაფეთქებელი ნივთიერება, სავარაუდოდ, ჰექსოგენი.

The Wall Street Journal, აშშ-ის დაზვერვის შეფასებებზე დაყრდნობით, იტყობინება, რომ მოსკოვი პირდაპირ კავშირშია ლაიფციგ/ჰალეში აღმოჩენილ დრონთან. რუსეთი უარყოფს რაიმე კავშირს. თუმცა, Politico-ს ცნობით, გაურკვეველი რჩება, თუ რა ახალი ინფორმაცია შეიძლება ბერლინს საშუალებას მისცეს ოფიციალურად დააკისროს პასუხისმგებლობა რუსეთს. გერმანიის შინაგან საქმეთა მინისტრმა ალექსანდრ დობრინდტმა ადრე განაცხადა, რომ ასეთი გადაწყვეტილების მისაღებად სერიოზული მტკიცებულებები ან „ძალიან ძლიერი ეჭვები“ იქნებოდა საჭირო.

მერცმა უკვე განაცხადა ინციდენტის მნიშვნელოვანი შედეგების შესახებ და ხაზგასმით აღნიშნა, რომ ლაიფციგში მომხდარი, სხვა საკითხებთან ერთად, აჩვენებს, რომ „ჩვენ ძალიან რეალური საფრთხეების წინაშე ვდგავართ“. „ფედერალური მთავრობა ჰიბრიდული თავდასხმებისთვის პასუხისმგებელ პირებს ავალდებულებს გადაიხადონ. ისინი გადაიხდიან ამისთვის“, - თქვა კანცლერმა. Politico-ს კითხვებზე რუსეთის წინააღმდეგ შესაძლო ბრალდების წაყენების შესახებ გერმანიის მთავრობის წარმომადგენელმა განაცხადა, რომ მერცის ოფისი არ სპეკულირებს და გადაწყვეტილება მიღებული იქნება გამოძიების ყველა დასკვნის შეფასების შემდეგ.

ორმა გერმანელმა ჩინოვნიკმა მოსალოდნელ ნაბიჯს „Zeitenwende 2.0“ უწოდა - მინიშნება გერმანიის თავდაცვის პოლიტიკის ისტორიულ ცვლილებაზე, რომელიც დაიწყო 2022 წელს რუსეთის მიერ უკრაინაში სრულმასშტაბიანი შეჭრის შემდეგ.

Politico-ს ცნობით, ბერლინის გადაწყვეტილებაზე გავლენა იქონია გერმანიის დედაქალაქთან ახლოს ტყეში ორი ნახევრადავტომატური პისტოლეტისა და დიდი რაოდენობით საბრძოლო მასალის აღმოჩენამ. გერმანიის გენერალური პროკურატურა ამჟამად იძიებს საქმეს, რომელიც სახელმწიფოსთვის საფრთხის შემცველი სერიოზული ძალადობრივი აქტის მომზადების ეჭვმიტანილია.

---

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან

---

დღის თემა

მთავარი თემა

ინტერვიუ - ექსკლუზივი