ჯაშუშობის ბრალდებით დაკავებულ ირაკლი ჩიხლაძეს, „სამოქალაქო მოსმენების კავკასიური ცენტრის“ დამფუძნებელსა და ხელმძღვანელს, 31 მაისს, სახელმწიფო უსაფრთხოების სამსახურის შენობაში ბრალი ოფიციალურად წარუდგინეს.

„ასეთი აბსურდი არ მაქვს არასდროს ნანახი, საერთოდ არანაირი შემხებლობა რაიმე ჯაშუშურ საქმიანობასთან ირაკლი ჩიხლაძეს არ აქვს“, - თქვა გიორგი გელხაურმა, ირაკლი ჩიხლაძის ადვოკატმა, სუს-ის შენობის დატოვების შემდეგ.

ადვოკატის მტკიცებით, საქმის მასალები თანახმად, რომელსაც გაეცნო, ირაკლი ჩიხლაძეს არანაირი შემხებლობა და კავშირი არ აქვს ჯაშუშურ საქმიანობასთან, მათ შორის, ქვეყნის სახელმწიფო ინტერესების შელახვასთან.

გიორგი გელხაურის თქმით, გამოძიებამ მათ გაუთქმელობის ხელშეკრულებაზე მოაწერინა ხელი:

„რთული მდგომარეობაა იმ გაგებით, რომ ხელი მოგვაწერინეს გაუთქმელობაზე, რადგან საიდუმლო წარმოება მიმდინარეობს ამ სისხლის სამართლის საქმეზე და ჩვენ არ გვაქვს იმის უფლება ვისაუბროთ, რა მტკიცებულებები არის საქმეში წარმოდგენილი და, შესაბამისად, როგორც საზოგადოების მაღალი ინტერესი არსებობს ამაზე, სამწუხაროდ, არ მოგვიწევს საუბარი“.

ადვოკატი განმარტავს, რომ ირაკლი ჩიხლაძის საქმეს არანაირი კავშირი არ აქვს 30 მაისს, ასევე ჯაშუშობის ბრალდებით დაკავებულ გულბაათ რცხილაძესთან, რომელიც პრორუსული ორგანიზაცია ევრაზიის ინსტიტუტის დირექტორია.

„ერთადერთი, საჯარო ინტერესებიდან გამომდინარე, შემიძლია გითხრათ, რომ რაიმე სახის სპეკულაციები არ მოჰყვეს, იმავე დღეს დააკავეს კიდევ გულბაათ რცხილაძე - საერთოდ არანაირი შემხებლობა არ აქვთ. ეს არის ორი დამოუკიდებელი, ავტონომიური საქმე და ერთმანეთთან ამ საქმეებს არანაირი კავშირი არ გააჩნიათ, გარდა იმისა, რომ ერთი კვალიფიკაციით და ერთი მუხლით არის ეს გამოძიება დაწყებული”, - აცხადებს ადვოკატი.

ავტორი: ექსპრესნიუსი,

სოციალური ქსელები

კინოპროდიუსერი და კინოთეატრების ქსელ კავეას ხელმძღვანელი ოთარ ბუბაშვილი გარდაიცვალა

მარინ ლეპენი დემოკრატიის საფრთხის შესახებ აფრთხილებს და მაკრონის მთავრობას აკრიტიკებს

ფასების ზრდის წინააღმდეგ საპროტესტო აქციები: მილანში 50 ადამიანი დააკავეს, შეტაკებები ტურინსა და ბოლონიაშიც

თურქ მომღერალ ილიას იალჩინტაშს ნარკოტიკებთან დაკავშირებულ საქმეში მინიმუმ 10 წლით თავისუფლების აღკვეთა ემუქრება