რადოსლავ სიკორსკი - ევროკავშირმა და კანდიდატმა ქვეყნებმა განსაკუთრებული ყურადღება უნდა მიაქციონ გაფართოების პროცესს

2025-02-20 18:45:21, 513 ნახვა

პოლიტიკა

„მოველით ანტიევროპული ტრენდის შებრუნებას, რომელიც საქართველოში „ქართულმა ოცნებამ“ დაამკვიდრა.“ - ამის შესახებ პოლონეთის საგარეო საქმეთა მინისტრმა, რადოსლავ სიკორსკიმ პოლონეთის, როგორც ევროკავშირის საბჭოს პრეზიდენტი ქვეყნის პრიორიტეტზე საუბრისას განაცხადა.

მისივე განცხადებით, გეოპოლიტიკური ცვლილებების ფონზე ევროკავშირმა და კანდიდატმა ქვეყნებმა განსაკუთრებული ყურადღება უნდა მიაქციონ გაფართოების პროცესს.

სიკორსკის თქმით, პოლიტიკური ვაკუუმის დატოვება უახლოეს სამეზობლოში - ბალკანეთში, უკრაინაში ან მოლდოვაში - კარის გაღებაა სხვა, არადემოკრატიული ძალებისთვის.

მან ისაუბრა გაფართოების პროცესში „უარყოფით ტრენდებზეც“ და ამ კონტექსტში საქართველო ახსენა და გამოთქვა მოლოდინი, რომ საქართველოში ანტიევროპული ტრენდი „შემობრუნდება. ასევე, მხარდაჭერა გამოხატა ქართული საზოგადოების პროევროპული მისწრაფებების მიმართ.

“როგორც ევროკავშირის საბჭოს პრეზიდენტი ქვეყანა, ვზრუნავთ ევროკავშირის აღმოსავლეთითა და სამხრეთით გაფართოების პროცესის სისწრაფესა და ხარისხზე. გეოპოლიტიკური ცვლილებებისა და ბევრი კრიზისის დროს, რომლებიც ახლა მსოფლიოში ხდება, ევროკავშირმა და კანდიდატმა ქვეყნებმა განსაკუთრებული ყურადღება უნდა მიაქციონ გაფართოების პროცესს.

პოლიტიკური ვაკუუმის დატოვება ჩვენს უახლოეს სამეზობლოში ბალკანეთში, უკრაინაში ან მოლდოვაში კარის გაღებაა სხვა, არადემოკრატიული ძალებისთვის. ჩვენი მიზანია გაწევრიანების შესახებ მოლაპარაკებებში პროგრესის მიღწევა როგორც უკრაინასთან და მოლდოვასთან, ასევე დასავლეთ ბალკანეთის ქვეყნებთან, რაც ევროკავშირის კანდიდატი ქვეყნების ჩართულობის დონის შესაბამისი იქნება.

სამწუხაროდ, გაფართოების პოლიტიკის ფარგლებში ასევე უარყოფით ტრენდებს ვადევნებთ თვალს. მოველით ანტიევროპული ტრენდის შებრუნებას, რომელიც საქართველოში „ქართულმა ოცნებამ“ დაამკვიდრა, რომელიც ხელისუფლებაში საეჭვო სტანდარტების საპარლამენტო არჩევნების შედეგად მოვიდა. პოლონეთის ევროკავშირის საბჭოში პრეზიდენტობა მხარს დაუჭერს ქართული საზოგადოების პროევროპულ მისწრაფებებს,” - განაცხადა სიკორსკიმ.