სახალხო დამცველის რწმუნებულებმა დაკავებულები თბილისში და ბათუმში მოინახულეს

2025-01-12 12:08:46, 557 ნახვა

საზოგადოება

11-12 იანვრის ღამეს, სახალხო დამცველის რწმუნებულებმა თბილისსა და ბათუმში დაკავებული 10 მოქალაქე მოინახულეს, მათ შორის, ერთი არასრულწლოვანი და დაკავების დროს დაშავებული შშმ პირთა უფლებადამცველი გია ჯვარშეიშვილი.

სახალხო დამცველის ინფორმაციით, დაკავებულთაგან ხუთი პირი პოლიციის მხრიდან შესაძლო არასათანადო მოპყრობაზე მიუთითებს. ერთ-ერთი მათგანის განცხადებით, პოლიციის მხრიდან სავარაუდო ძალადობის შედეგად, მას გულმკერდისა და თავის არეში ტკივილები აქვს, აღენიშნება ასევე ნაკაწრები ხელებზე.

სამი დაკავებულის სურვილია დაიწყოს გამოძიება, რის შესახებაც სახალხო დამცველის აპარატმა უკვე აცნობა სპეციალურ საგამოძიებო სამსახურს, რათა მოხდეს შესაბამისი სამართლებრივი რეაგირება.

დაკავებულების უმეტესობა მიუთითებს, რომ პოლიციელებმა არ განუმარტეს დაკავების საფუძველი და უფლებები. ოთხი დაკავებული ასევე საუბრობენ პოლიციის მხრიდან არაეთიკურ მიმართვასა და სიტყვიერ შეურაცხყოფაზე.

სახალხო დამცველის აპარატი აგრძელებს დაკავებულების მონახულებას და საზოგადოებას დამატებით ინფორმაციას მიაწვდის.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,