ხათუნა ლაგაზიძე: თურქეთი უმძიმესი არჩევანის წინაშეა, საკუთარ საზღვართან დათანხმდეს ქურთული ავტონომიის შექმნას, ან ჩაერთოს რუსეთთან კონფრონტაციაში

2016-02-23 13:38:26, 3524 ნახვა

Lifestyle

„თურქეთ-სირიის საზღვრის გასწვრივ, ქურთული ავტონომიის შექმნა, რასაც რუსეთი აქტიურად უწყობს ხელს, ფაქტობრივად ნიშნავს თურქეთის სახელმწიფოს რღვევის მრავალწლიანი, სისხლისმღვრელი პროცესის დაწყებას“, - ამის შესახებ სოციალურ ქსელ facebook-ში „საქართველოს განვითარების ფონდის“ წევრი, პოლიტოლოგი ხათუნა ლაგაზიძე პოსტს აქვეყნებს.

პაატა ბურჭულაძის თანაგუნდელი აცხადებს, რომ თურქეთი უმძიმესი არჩევანის წინაშეა ან დათანხმდეს თურქული ავტონომიის შექმნას, რაც სისხლისმღვრელი პროცესის დაწყებას გამოიწვევს, ან დაიწყოს სამხედრო ოპერაცია სირიაში, რაც რუსეთთან კონფრონტაციის ტოლფასია.

„მსოფლიოს ლიდერები უკვე ხმამაღლა საუბრობენ რუსეთ-თურქეთს შორის მოსალოდნელ სამხედრო დაპირისპირებაზე: თურქეთ-სირიის საზღვრის გასწვრივ, ქურთული ავტონომიის შექმნა, რასაც რუსეთი აქტიურად უწყობს ხელს, ფაქტობრივად ნიშნავს თურქეთის სახელმწიფოს რღვევის მრავალწლიანი, სისხლისმღვრელი პროცესის დაწყებას.

თურქეთი უკიდურესად მძიმე არჩევანის წინაშეა: ან შეეგუოს ქურთული ავტონომიის შექმნას საკუთარ საზღვრებთან, რითიც საფუძველს დაუდებს მრავალწლიან კონფლიქტს ქურთებთან საკუთარ ტერიტორიაზე, ან დაიწყოს სამხედრო ოპერაცია სირიაში, რაც რუსეთთან კონფრონტაციის ტოლფასია; ევროკავშირი, რომელიც ვერაფრით უმკლავდება მიგრანტთა უზარმაზარ ნაკადებს, დაჩქარებული წესით განიხილავს, კონფლიქტის თურქეთის ტერიტორიაზე შეღწევის შემთხვევაში, მიგრანტთა ახალი - თურქული - ტალღის გაჩენის შესაძლებლობას და ევროკავშირის მოსალოდნელ რეაქციას ამ უზარმაზარ გამოწვევაზე; აღარაფერს ვამბობთ, რუსეთსა და ნატოს წევრ - თურქეთს - შორის კონფლიქტის შემთხვევაში, ნატოს წინაშე მდგარ გამოწვევაზე; აზერბაიჯანი, რომელიც კარგად აცნობიერებს მოსალოდნელ საფრთხეებს, ცდილობს შუამავლის როლი ითამაშოს რუსეთსა და თურქეთს შორის და ა.შ.

ჩვენ გვაქვს უფლება ვიცოდეთ რას აკეთებს ამ დროს საქართველოს ხელისუფლება, გარდა იმისა, რომ ყოველდღე საჯაროდ განიხილავს მმართველ კოალიციაში მიმდინარე დაპირისპირების დეტალებს. ეს არ არის მხოლოდ ხელისუფლების პრობლემა, ეს მთელი საზოგადოების პრობლემაა და შესაბამისად, აუცილებელია პროფესიონალთა აქტიური ჩართვა ამ პროცესში, თუნდაც კონსულტირების და მოსაზარებათა ურთიერთგაცვლის დონეზე“, - წერს ხათუნა ლაგაზიძე სოციალურ ქსელში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან