პრეზიდენტი - მივმართავ ახალგაზრდებს, ჩვენი ბრძოლა გადის არჩევნებზე და ყველა იმ კანონის გაუქმებაზე, რომელიც ევროპული გზიდან გვაშორებს [ვიდეო]

2024-05-01 23:09:20, 423 ნახვა

პოლიტიკა

მე მინდა, მივმართო გულანთებულ ახალგაზრდებს - ჩვენი ბრძოლა პრაქტიკულად ეს კანონი არ არის, ჩვენი ბრძოლა გადის არჩევნებზე და გადის ყველა იმ კანონის გაუქმებაზე, რომელიც მიღებული არის ამ ბოლო დროს, ამ ხელისუფლების მიერ და რომელიც ერთი მეორის მერე გვაშორებს ჩვენ ევროპული გზიდან,- ამის შესახებ საქართველოს პრეზიდენტი სალომე ზურაბიშვილი "უცხოური გავლენის გამჭვირვალობის შესახებ" კანონპროექტის საწინააღმდეგო აქციის მონაწილეებისადმი გავრცელებულ ვიდეომიმართვაში აცხადებს.

როგორც ზურაბვიშვილი სპეციალურ ვიდეომიმართვაში ამბობს, ახალგაზრდობა მსოფლიოს აჩვენებს, "თუ რა არის საქართველო, რა შეუძლია საქართველოს და რა შეუძლია საქართველოს ახალგაზრდობას".

"ვადევნებ თვალ-ყურს ამ საღამოს მოვლენებს სასახლიდან და თქვენს გვერდით ვარ, როგორც არაერთხელ მითქვამს. დღევანდელი გამოსვლები და მთელი მსოფლიო გვიყურებს, აჩვენებს საქართველოს ხალხის განწყობას, შემართებას და მიზანმიმართულობას. ეს არის უდიდესი ძალა იმისთვის, რომ ჩვენ მოვიგოთ ის გრძელვადიანი ბრძოლა, რომელიც მთავრდება არჩევნებზე, რომ საქართველო არ იქნება რუსეთი და არასდროს არ იქნება რუსეთი.

მე მინდა, მივმართო იმ გულანთებულ ახალგაზრდებს, რომლებიც დღეს არიან და დღეს ამ დონეზე თავიანთ ენერგიას გვიზიარებენ, მინდა, მივმართო მათ, რომ რაღაცები არ არის საჭირო და დაანებეთ თავი პარლამენტის კარებს, იქ არაფერი აღარ ხდება. იქ მეორე მოსმენით უკვე მიღებულია ეს კანონი და ჩვენი ბრძოლა პრაქტიკულად ეს კანონი არ არის, ჩვენი ბრძოლა გადის არჩევნებზე და გადის ყველა იმ კანონის გაუქმებაზე, რომელიც მიღებული არის ამ ბოლო დროს, ამ ხელისუფლების მიერ და რომელიც ერთი მეორის მერე გვაშორებს ჩვენ ევროპული გზიდან. ეს არის ჩვენი მიზანი.

ასე რომ, კარებზე არაფერი არ გადაწყდება, გარდა იმ გაზის გამოშვება და რაღაც ძალადობა, რომელიც არ არის საჭირო, რომ გამოვიწვიოთ იმიტომ, რომ ძალადობასთან გვექნება უთუოდ საქმე მომავალში. ჯერ ერთი, დღეს არის ვნების კვირა, დღეს არის ის პერიოდი, როცა არ შეიძლება გამოწვევა ძალადობის, ისედაც გააქტიურებული არის ეშმაკი. ჩვენ ეს ვიმყოფოთ და ვიყოთ მშვიდობიანად რუსთაველის გამზირზე, სადაც ვაჩვენებთ კიდევ ერთხელ მსოფლიოს, თუ რა არის საქართველო, რა შეუძლია საქართველოს და რა შეუძლია საქართველოს ახალგაზრდობას",- აცხადებს სალომე ზურაბიშვილი.