2024-04-29 15:11:54, 425 ნახვა

---

კანონის მეორე მოსმენით განხილვა დეპუტატების გაძევებისა და ცენზურის ფონზე მიმდინარეობს - არასამთავრობოები

ე,წ  უცხო ქვეყნების გავლენის კანონის მეორე მოსმენით განხილვა დეპუტატების გაძევებისა და ცენზურის ფონზე მიმდინარეობს. - ამის შესახებ   არასამთავრობო ორგანიზაციები ამ წუთებში პარლამენტში მიმდინარე პროცესებზე განცხადებას ავრცელებენ.

განცხადებაში ნათქვამია, რომ კომიტეტის თავმჯდომარე, ანრი ოხანაშვილი, საქართველოს პარლამენტის რეგლამენტის დარღვევით, ოპოზიციონერ დეპუტატებსა და სამოქალაქო საზოგადოების წარმომადგენლებს კითხვის დასრულების შესაძლებლობას არ აძლევს და აძევებს დარბაზიდან. ამ დროისთვის სხდომიდან გაძევებულია 11 დეპუტატი, "გირჩის" წევრმა იაგო ხვიჩიამ კი სხდომა მისი ინიციატივით დატოვა. 

"კომიტეტის თავმჯდომარე ბოროტად იყენებს უფლებამოსილებას და ზღუდავს დეპუტატების საქართველოს პარლამენტის რეგლამენტით გარანტირებულ შესაძლებლობას - ოპონირება გაწიონ, დასვან მწვავე კითხვები და მიიღონ პასუხები. იურიდიული კომიტეტის თავმჯდომარის მიერ განსახილველ საკითხებთან დაკავშირებით ოპოზიციის წარმომადგენლებისთვის სიტყვის ჩამორთმევის და გაძევების პრაქტიკა არღვევს წარმომადგენლობითი დემოკრატიის ფუნდამენტურ პრინციპებს. ოხანაშვილის ეს ქმედება არ შეესაბამება არც პარლამენტის რეგლამენტის 224-ე მუხლს. აღნიშნული ნორმის მიზანია  სხდომაზე წესრიგის უზრუნველყოფა და ის არ ითვალისწინებს პარლამენტის წევრებისთვის მოსაზრების (მათ შორის, განსხვავებული აზრის) დაფიქსირების შესაძლებლობის ჩამორთმევას სხდომის თავმჯდომარის მიერ. გარდა ამისა, პარლამენტის რეგლამენტი არ ითვალისწინებს კანონპროექტის მეორე მოსმენით განხილვის ფარგლებში კითხვებთან ერთად მოსაზრებების წარდგენის დაუშვებლობას, არამედ საკომიტეტო მოსმენამ უნდა უზრუნველყოს საკითხის სრულყოფილი შესწავლა, მათ შორის, ალტერნატიული წინადადების მოსმენისა და განხილვის შესაძლებლობა.

ამასთანავე, ოხანაშვილი უხეშად ერევა პარლამენტის წევრების უფლებაში, თავად განსაზღვრონ კითხვის შინაარსი და არ აძლევს სათანადო დროს მის დასასმელად, რითაც იხშობა კრიტიკული აზრი და ხელოვნურად იქმნება „რუსული კანონის” ერთპარტიულად განხილვის გარემო. 

მოვუწოდებთ პარლამენტის იურიდიულ საკითხთა კომიტეტის თავმჯდომარეს, მაღალი საზოგადოებრივი ინტერესიდან გამომდინარე, სხდომაზე მყოფ პირებს, მაქსიმალურად მისცეს კითხვების დასმისა და საკუთარი აზრის გამოხატვის საშუალება", - წერია განცხადებაში.

ხელს აწერენ:

1. სამართლიანი არჩევნებისა და დემოკრატიის საერთაშორისო საზოგადოება
2. სამოქალაქო საზოგადოების ფონდი
3. საქართველოს ახალგაზრდა იურისტთა ასოციაცია
4. საერთაშორისო გამჭვირვალობა - საქართველო
5. საქართველოს სასამართლოს გუშაგი
6. საქართველოს ევროპული ორბიტა 
7. საფარი
8. ევროპულ-ქართული ინსტიტუტი 
9. მრავალპარტიული დემოკრატიის ცენტრი
10. მწვანე ალტერნატივა
11. მედიის განვითარების ფონდი
12. ინფორმაციის თავისუფლების განვითარების ინსტიტუტი
13. საბჭოთა წარსულის კვლევის ლაბორატორია
14. ტოლერანტობის და მრავალფეროვნების ინსტიტუტი
15. საქართველოს რეფორმების ასოციაცია
16. დემოკრატიის მცველები
17. Tbilisi Pride
18. საქართველოს მომავლის აკადემია უერთდება

იურიდიულ საკითხთა კომიტეტის თავმჯდომარემ ანრი ოხანაშვილმა "ერთიანი ნაციონალური მოძრაობის" წევრები დავით ხაჯიშვილი და გიორგი გოდაბრელიძე, ასევე "ევროოპტიმისტების" წარმომადგენელი, ხატია დეკანოიძე გააძევა.ამით, გაძევებული დეპუტატების რაოდენობა 11-მდე გაიზარდა. 

პროტესტის ნიშნად სხდომა დატოვა "გირჩის" ლიდერმა, იაგო ხვიჩიამ.

მანამდე სხდომიდან გააძევეს ოპოზიციის დეპუტატები - ლევან ხაბეიშვილი, ანი წითლიძე, თამარ კორძაია, ქეთი თურაზაშვილი, ლევან ბეჟაშვილი, გიორგი ვაშაძე, სალომე სამადაშვილი და თაკო ჩარკვიანი. 

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი