2023-11-12 14:33:17, 757 ნახვა

---

სუს-ის მიერ დაკავებულ უცხო ქვეყნის 2 მოქალაქეს აღკვეთის ღონისძიების სახით პატიმრობა შეეფარდა

თბილისის საქალაქო სასამართლომ სახელმწიფო უსაფრთხოების სამსახურის მიერ დაკავებულ უცხო ქვეყნის 2 მოქალაქეს აღკვეთის ღონისძიების სახით პატიმრობა შეუფარდა. გადაწყვეტილება მოსამართლემ ცოტა ხნის წინ მიიღო.

როგორც დაკავებულების ადვოკატმა მედიის წარმომადგენლებთან საუბრისას განაცხადა, დაცვის მხარე, საკმარისი მტკიცებულებების არ არსებობის გამო, მოითხოვდა, რომ მათ მიმართ აღკვეთის ღონისძიების არცერთი სახე არ გამოყენებულიყო.

"დღეს სასამართლომ იმსჯელა აღკვეთის ღონისძიების შეფარდების თაობაზე ჩემი დაცვის ქვეშ მყოფების მიმართ. ბრალდების მხარე ითხოვდა აღკვეთის ღონისძიების სახით მათ მიმართ გამოყენებული ყოფილიყო დაპატიმრება, ხოლო დაცვის მხარე, ვინაიდან დასაბუთებული ვარაუდის სტანდარტით არ იყო საკმარისი მტკიცებულებები, ჩვენ მოვითხოვეთ, რომ მათ მიმართ არ ყოფილიყო გამოყენებული აღკვეთის ღონისძიების არცერთი სახე, თუმცა სასამართლომ მათ მიმართ ამ ეტაპზე გამოიყენა დაპატიმრება",- განაცხადა დაკავებულების უფლებადამცველმა.

რაც შეეხება ბრალდების მხარეს, როგორც პროკურომა ჟურნალისტებთან განმარტა, აღკვეთის ღონისძიების სახით პატიმრობის გამოუყენებლობის შემთხვევაში, არსებობდა როგორც მიმალვის, ისე ახალი დანაშაულის ჩადენისა და გამოძიებისთვის ხელის შეშლის საფრთხე.

"სასამართლომ სრულად გაიზიარა ბრალდების მხარის პოზიცია, რომ არსებობდა ორივე ბრალდებულის მიმართ ყველაზე მკაცრი აღკვეთის ღონისძიების გამოყენების საფუძველი. კერძოდ, არსებობდა მათი მხრიდან მიმალვის საფრთხე, ახალი დანაშაულისა და გამოძებისთვის ხელის შეშლის საფრთხე",- თქვა პროკურორმა.

შეგახსენებთ, სახელმწიფო უსაფრთხოების სამსახურმა უცხო ქვეყნის 2 მოქალაქე გუშინ, 11 ნოემბერს დააკავა. სუს-ის მიერ გავრცელებული ინფორმაციის თანახმად, ისინი საქართველოს სახელმწიფო საზღვარზე მიგრანტის უკანონოდ გადაყვანის და მისთვის საქართველოში ყოფნისთვის შესაბამისი პირობების შექმნის მომზადების ფაქტზე დააკავეს.

"კონტრტერორისტულმა ცენტრმა სპეციალური ოპერაცია ქალაქ თბილისში ორ ლოკაციაზე ერთდროულად ჩაატარა. საგამოძიებო მოქმედებების შედეგად ამოღებულია სხვადასხვა სახის ელექტრონული ინფორმაციის მატარებელი მოწყობილობები, სამხედრო აღჭურვილობა, სახის ნიღბები, ელექტრო შოკები, უცხო ქვეყნის ყალბი პირადი დოკუმენტები, ფეთქებადი ნივთიერებები, კუსტარულად დამზადებული ასაფეთქებელი მოწყობილობები და დროშა, ტერორისტული ორგანიზაცია „ისლამური სახელმწიფოს“ სიმბოლიკით",- ნათქვამია სახელმწიფო უსაფრთხოების სამსახურის ინფორმაციაში.

სუს-ის ცნობითვე, გამოძიება სისხლის სამართლის კოდექსის 344-ე პირველი პრიმა და 236-ე მუხლებით მიმდინარეობს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი