ზოგადი განათლების სახელმწიფოს მიერ დაფინანსების მქონე პირთა წრე ფართოვდება

2015-02-10 18:28:45, 1063 ნახვა

საზოგადოება

ზოგადი განათლების შესახებ საქართველოს კანონის საკონსტიტუციო სასამართლოს გადაწყვეტილებასთან შესაბამისობაში მოსაყვანად, დღეს განათლების მეცნიერებისა და კულტურის კომიტეტმა იურიდიულ საკითხთა კომიტეტის მიერ წარმოდგენილი საკანონმდებლო ინიციატივა მეორე მოსმენით განიხილა. როგორც მომხსენებელმა, თამარ კორძაიამ განმარტა, სახელმწიფოს მიერ ზოგადი განათლების დაფინანსება გავრცელდება საქართველოს მოქალაქეზე, პირადობის ნეიტრალური დოკუმენტის, ან ნეიტრალური სამგზავრო დოკუმენტის მქონე პირზე, უცხო ქვეყნის მოქალაქეზე, მათ შორის, უცხოეთში მცხოვრებ თანამემამულის სტატუსის მქონე უცხო ქვეყნის მოქალაქეზე და მოქალაქეობის არმქონე პირზე.
„პირველი მოსმენით კანონპროექტის განხილვისას მოსაზრებები მოგვაწოდეს ლტოლვილთა და განსახლების სამინისტროს წარმომადგენლებმა. მათ დააზუსტეს, რომ აუცილებელი იყო, კანონპროექტში ჩაგვეწერა ასევე დროებითი საიდენტიფიკაციო მოწმობის მქონე პირებიც. ეს ის ადამიანები არიან, რომლებიც საქართველოს ტერიტორიაზე შემოვიდნენ და არ აქვთ მიღებული არანაირი სტატუსი. ჩამონათვალს დავამატეთ ასევე ჰუმანიტარული სტატუსის მქონე პირები. რომელიმე სეგმენტი რომ არ გამოგვრჩენოდა, გავიზიარეთ მათი მოსაზრებები და, შესაბამისად, ავსახეთ წარმოდგენილ კანონპროექტში“, - განაცხადა თამარ კორძაიამ. კომიტეტის თავმჯდომარის, ივანე კიღურაძის შეფასებით, ეს არის მნიშვნელოვანი და საჭირო კანონპროექტი. მისივე ვარაუდით, ასეთივე კანონი ევროპის ქვეყნებში გავრცელდება ქართველ მოსწავლეებზე.
კომიტეტის წევრებმა მხარი დაუჭირეს კანონპროექტის პლენარულ სხდომაზე გატანას. „უნდა ვიგულისხმოთ, რომ, ალბათ, ევროპის ქვეყნებშიც გავრცელდება ქართველებზე ანალოგიური პროექტი“, - განაცხადა ივანე კიღურაძემ.
დღესვე კომიტეტმა მესამე მოსმენით განიხილა "უმაღლესი განათლების შესახებ“ კანონში შესატანი ცვლილება, რომლითაც უმაღლეს საგანმანათლებლო დაწესებულებებს განსაკუთრებული დამსახურების მქონე პროფესორ-მასწავლებლებისთვის ფულადი ანაზღაურების დანიშვნის უფლება მიეცემა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან