2023-06-26 18:37:53, 675 ნახვა

---

მდინარაძე - მთელი მსოფლიო გარინდებული იყო, საქართველოდან პოლიტიკური ძალები კი, ერთ-ერთ მხარეს უჭერდნენ მხარს

მთელი მსოფლიო იყო გარინდებული, მათ შორის, უკრაინელებიც ხმას არ იღებდნენ და აკვირდებოდნენ სიტუაციას, საქართველოში კი, აღმოჩნდნენ პოლიტიკური ძალები და კონკრეტული ოპოზიციის წარმომადგენლები, რომლებიც მხარდაჭერას უცხადებდნენ ერთ-ერთ მხარეს რუსეთში, - ამის შესახებ "ქართული ოცნების" ერთ-ერთმა ლიდერმა, მამუკა მდინარაძემ, სამხედრო დაჯგუფება "ვაგნერის" ამბოხებასთან დაკავშირებით განაცხადა.

როგორც მდინარაძემ აღნიშნა, მხარე, რომელსაც ოპოზიცია მხარს უჭერდა ყველაზე სასტიკად იყო ჩაბმული უკრაინის ომში და იქ მონაწილეობას იღებდნენ უკრაინელი სამხედროების, ქალებისა და ბავშვების დახოცვაში.

"მთელი მსოფლიო იყო გარინდებული, მათ შორის, უკრაინელებიც ხმას არ იღებდნენ და აკვირდებოდნენ სიტუაციას. მთელი მსოფლიოს ყველა ლიდერი საუბრობდა იმასთან დაკავშირებით, რომ უნდა დავაკვირდეთ მოვლენების განვითარებას. იმიტომ, რომ არავინ იცოდა ეს რაღაც დადგმული პროვოკაცია იყო, არავინ იცოდა ეს რაღაც რეალური ამბოხი იყო, რა ხდებოდა და საქართველოდან, სამწუხაროდ, აღმოჩნდნენ პოლიტიკური ძალები და კონკრეტული ოპოზიციის წარმომადგენლები, რომლებიც მხარდაჭერას უცხადებდნენ ერთ-ერთ მხარეს რუსეთში, შიდა სამხედრო დაპირისპირების დროს. და არ დაგვავიწყდეს, რომ ეს მხარე იყო იმ ადამიანის ხელმძღვანელობით, რომელიც ყველაზე სასტიკად იყო ჩაბმული უკრაინის ომში და იქ მონაწილეობა ჰქონდა უკრაინელი სამხედროების, ქალებისა და ბავშვების დახოცვაში, აქტიური მონაწილეობა და მისი ავტორები იყვნენ. აი, ამ ადამიანს და ამ ადამიანებს გულმხურვალედ გულშემატკივრობდნენ საქართველოდან რადიკალური ოპოზიციის წარმომადგენლები, სამწუხაროდ", - განაცხადა მდინარაძემ.

შეგახსენებთ, 23 ივნისს რუსული კერძო სამხედრო დაჯგუფების, „ვაგნერის“ ხელმძღვანელმა, ევგენი პრიგოჟინმა რუსეთის თავდაცვის სამინისტრო "ვაგნერის" ბანაკებზე სარაკეტო თავდასხმაში დაადანაშაულა. 

24 ივნისს, პრიგოჟინმა გაავრცელა ვიდეომიმართვა და განაცხადა, რომ როსტოვის სამხედრო ობიექტები, მათ შორის აეროდრომი „ვაგნერის" კონტროლის ქვეშ იყო, თავად კი, დაჯგუფებასთან ერთად მოსკოვისკენ მიემართებოდა.

შექმნილ ვითარებაზე საგანგებო განცხადება გააკეთა რუსეთის პრეზიდენტმა, ვლადიმერ პუტინმა და თქვა, რომ "პრიგოჟინის ქმედებები ღალატის ტოლფასია და მოსკოვს ამაზე მკაცრი რეაგირება ექნება".

მოგვიანებით, ევგენი პრიგოჟინმა კიდევ ერთი აუდიომიმართვა გაავრცელა და აღნიშნა, რომ კერძო სამხედრო დაჯგუფება „ვაგნერი" უკან იხევდა და საველე დისლოკაციის ადგილზე ბრუნდებოდა.

აღნიშნულის შემდეგ, რუსეთის ფედერაციის პრეზიდენტის პრესმდივანმა, დიმიტრი პესკოვმა განაცხადა, რომ პრიგოჟინის წინააღმდეგ რუსეთში აღძრული სისხლის სამართლის საქმე შეწყდება, თავად "ვაგნერის" ხელმძღვანელი კი, ბელარუსში გაემგზავრება.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი