ირაკლი ჩიქოვანი - ბევრ ევროპელ პოლიტიკოსს აქვს მცდარი შეფასება, თუ რა ხდებოდა ქვეყანაში 2012 წლამდე, ამიტომ უჭირთ იმ პროგრესის დანახვა, რომელიც 2012 წლის შემდგომ არის

2023-06-16 00:50:33, 801 ნახვა

პოლიტიკა

„ვერავინ მომიყვანს ვერცერთ ციტატას, სადაც ჩვენი პოლიტიკური ძალის ლიდერები რაიმეს ანტიდასავლურს ამბობენ. მაგრამ თუ ჩვენი პოლიტიკური ძალის ლიდერები კითხვას სვამენ ზოგიერთი პოლიტიკოსების მიერ მიღებულ გადაწყვეტილებაზე, ეს ჩვენი ლეგიტიმური უფლებაა,“- ამის შესახებ ფრაქცია „ქართული ოცნების“ თავმჯდომარის მოადგილე ირაკლი ჩიქოვანმა გადაცემაში „იმედი LIVE” განაცხადა.

ჩიქოვანი პასუხობს ევროპელი პოლიტიკოსების მოსაზრებას იმის შესახებ, რომ საქართველოს ხელისუფლებას ანტიდასავლური რიტორიკა აქვს და აცხადებს, რომ ბევრ ევროპელ პოლიტიკოსს დღემდე აქვს მცდარი შეფასება იმისა, თუ რა ხდებოდა ქვეყანაში 2012 წლამდე.

„ნებისმიერი ევროპელი პოლიტიკოსი, რომლის მოსაზრებითაც ბიძინა ივანიშვილი არის ამ ქვეყნის პრობლემა, ხოლო დავით კეზერაშვილი არის ამ ქვეყნის კეთილი მომავალი, არ უნდა აღიქვამდეს, ჩვენ ამ გადაწყვეტილებას რომ გავაკრიტიკებთ, რომ ვიტყვით, რომ ეს არის ინსტიტუციის დაზიანება, ევროპარლამენტს ვგულისხმობ ამ შემთხვევაში, არ უნდა იყოს ასე მტკივნეულად აღქმული იმიტომ, რომ ეს მარტო ჩვენი აღქმა არ არის, ეს მილიონობით საქართველოს მოქალაქის აღქმაა. ეს არის ობიექტური რეალობა, რომელსაც ყველამ თვალი უნდა გაუსწოროს. წარმოუდგენელია, ევროპული ქალაქებიდან არჩეულ დეპუტატებს უკეთესი წარმოდგენა ჰქონდეს იმაზე, თუ რა ხდება პირობითად, ზუგდიდში, გურჯაანში ან ლაგოდეხში. კარგად უნდა გვესმოდეს, რომ როდესაც ვიღებთ გადაწყვეტილებებს ჩვენ ვიაზრებთ იმ პასუხისმგებლობას, რაც გვაკისრია, მაგრამ ვერ მოვატყუებთ ჩვენს საზოგადოებას და ვერ დავახუჭინებთ თვალს იმაზე, თუ რა ხდებოდა ამ ქვეყანაში წლების განმავლობაში და ეს არის პრობლემა. პრობლემა მდგომარეობს იმაში, რომ ჯერაც კი ბევრ ევროპელ პოლიტიკოსს აქვს მცდარი და არასწორი შეფასება იმისა, თუ რა ხდებოდა ქვეყანაში 2012 წლამდე და სამწუხაროდ, ამის ფონზე უჭირთ იმ პროგრესის დანახვა, რომელიც 2012 წლის შემდგომ არის“-განაცხადა ირაკლი ჩიქოვანმა.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),