კასიანოვი „ოცნებაზე“ - ყველაზე გაუგებარია კიევში ჩასვლაზე მოწვევის მიღების ფაქტის დამალვის მცდელობა

2023-02-24 16:59:39, 906 ნახვა

პოლიტიკა

უკრაინული მხარისთვის ყველაზე გაუგებარია კიევში ჩასვლაზე მოწვევის მიღების ფაქტის დამალვის მცდელობა, - ამის შესახებ საქართველოში უკრაინის საქმეთა დროებითმა რწმუნებულმა, ანდრეი კასიანოვმა "ქართულ ოცნების" რადაში მიწვევის შესახებ განაცხადა.

როგორც კასიანოვმა რუსეთ-უკრაინის ომის ერთი წლისთავთან დაკავშირებით, ჟურნალისტებთან გამართულ სპეციალურ შეხვედრაზე აღნიშნა, უკრაინა, ომში ჩაბმის მცდელობასთან დაკავშირებით, საქართველოს ხელისუფლების წარმომადგენლების ნებისმიერ ბრალდებას უარყოფს.

"ჩვენ იმედგაცრუებულები ვართ არა იმდენად იმ ფაქტით, რომ "ქართულმა ოცნებამ" კიევში ჩასვლაზე უარი განაცხადა, არამედ "ქართული ოცნების" ცალკეული პოლიტიკოსების განცხადებებით, რომელიც უკრაინაში რუსეთის ფედერაციის სრულმასშტაბიანი შემოჭრის წლისთავისადმი მიძღვნილ ღონისძიებებში უკრაინის რადას მიწვევის უგულებელყოფას უკავშირდება.

უკრაინული მხარისთვის ყველაზე გაუგებარია ასეთი მოწვევის მიღების ფაქტის დამალვის მცდელობა, თუ გავითვალისწინებთ იმას, რომ საქართველოს პარლამენტში და უკრაინასთან მეგობრობის ჯგუფში არა მხოლოდ "ქართული ოცნების" დეპუტატები არიან წარმოდგენილი, ამის მიუხედავად, ამჟამად უკრაინაში იმყოფება რამდენიმე ქართული პოლიტიკური ძალის წარმომადგენელი, მათ შორის პარლამენტის წევრები მეგობრობის ჯგუფიდან... ჩვენ მტკიცედ უარვყოფთ გარკვეული პოლიტიკოსებისა და საქართველოს ხელისუფლების წარმომადგენლების მიერ უკრაინის წინააღმდეგ გამოთქმულ ნებისმიერ ბრალდებებს საქართველოს რუსეთის ფედერაციასთან ომში ჩაბმის მცდელობასთან დაკავშირებით", - განაცხადა ანდრეი კასიანოვმა.

შეგახსენებთ, საპარლამენტო დელეგაციამ, უკრაინის რადას ოფიციალურ მიწვევაზე, რომ ომის წლისთავთან დაკავშირებით უკრაინას სწვეოდა, უარი განაცხადა. აღსანიშნავია, რომ მმართველი პოლიტიკური გუნდიდან აღნიშნულ საკითხზე განცხადებები მას შემდეგ გაკეთდა, რაც ფაქტი "სტრატეგია აღმაშენებლის" ლიდერმა, გიორგი ვაშაძემ გაასაჯაროვა.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,