საქართველოს გენერალური პროკურორი ირაკლი შოთაძე საქართველოში ევროკავშირის წარმომადგენლობის თანამშრომლობის უფროსის მოადგილეს, კატალინ გერმანს და გაეროს პროექტების მომსახურების ოფისის (UNOPS) ხელმძღვანელს საქართველოში, მიკელ ბროჰოლტს შეხვდა. 

გენერალურ პროკურატურაში გამართულ შეხვედრას გენერალური პროკურორის მოადგილე ნათია მერებაშვილი ესწრებოდა.

მხარეებმა ევროკავშირის მიერ დაფინანსებული პროექტის „ევროკავშირი უსაფრთხოებისთვის, ანგარიშვალდებულებისა და დანაშაულის წინააღმდეგ ბრძოლისთვის საქართველოში" ფარგლებში საქართველოს პროკურატურისთვის გაწეული მხარდაჭერა განიხილეს.

გენერალურმა პროკურორმა შეხვედრის მონაწილეებს პროექტის წარმატებით განხორციელებისა და გაწეული მხარდაჭერისთვის მადლობა გადაუხადა.

შეხვედრის დასასრულს მხარეებმა თანამშრომლობის მნიშვნელობას გაუსვეს ხაზი და სამომავლო გეგმები განიხილეს.

ასევე, საქართველოს პროკურატურაში პროექტის „ტექნიკური შესაძლებლობების განვითარების ხელშეწყობა ადამიანის უსაფრთხოების უზრუნველსაყოფად" მესამე მმართველი კომიტეტის სხდომაც გაიმართა.

ღონისძიება საქართველოს გენერალური პროკურორის მოადგილემ ნათია მერებაშვილმა, საქართველოში ევროკავშირის წარმომადგენლობის თანამშრომლობის უფროსის მოადგილემ კატალინ გერმანმა და UNOPS-ის წარმომადგენელმა საქართველოში მიკელ ბროჰოლტმა გახსნეს.

მხარეებმა პროექტის ფარგლებში განხორციელებული ტექნიკური შესაძლებლობების გაძლიერებისკენ მიმართული აქტივობების პროგრესი შეაფასეს და სამომავლო ღონისძიებები განიხილეს.

„ევროკავშირი უსაფრთხოებისთვის, ანგარიშვალდებულებისა და დანაშაულის წინააღმდეგ ბრძოლისთვის საქართველოში (SAFE)" მიერ დაფინანსებული პროექტი „ტექნიკური შესაძლებლობების გაძლიერების მხარდაჭერა" საქართველოში 2020 წლიდან დაიწყო. მათი მხარდაჭერით საქართველოს გენერალურ პროკურატურასა და საოლქო პროკურატურებში თანამედროვე სტანდარტების მქონე ვიდეო-საკონფერენციო სისტემა დამონტაჟდა. ვიდეო-საკონფერენციო სისტემა საშუალებას იძლევა უსაფრთხოების მაღალი ხარისხის სტანდარტით, დისტანციურ რეჟიმში განხორციელდეს სასამართლო პროცესები, სისხლის სამართლის საქმეებზე მოწმეთა დისტანციური გამოკითხვა/დაკითხვა, საერთაშორისო თუ ადგილობრივ პარტნიორებთან დისტანციური შეხვედრების/მოლაპარაკებების გამართვა, საერთაშორისო თანამშრომლობის ფარგლებში, პარტნიორ ქვეყნებთან კავშირის დამყარება, ცალკეული დანაშაულების დროს რამდენიმე ქვეყნის მიერ ერთობლივი საგამოძიებო მოქმედებების დაგეგმვისას მათთან კომუნიკაცია და სასწავლო აქტივობების დისტანციურ ფორმატში ჩატარება.

ავტორი: NS (სტატია დაფინანსებულია),

სოციალური ქსელები

ფეიქრიშვილის საქმე: პროკურატურამ პენიტენციურის უფროსისთვის უფლებამოსილების შეჩერების რეკომენდაცია გასცა

გახარია საქართველოსთვის საპარლამენტო მანდატებზე უარს იტყვის საკონსტიტუციოს მიერ პარტიის აკრძალვის შემთხვევაში

Politico - ევროკავშირი წლის ბოლომდე უკრაინისთვის 45 მილიარდი ევროს ოდენობის სესხის გამოყოფას გეგმავს.

პაპუაშვილი - იმაზე სამჯერ მეტი ადამიანი მონათლა გუშინ პატრიარქმა ზემო აჭარაში, ვიდრე თბილისში აქციაზე ვიხილეთ