2015-02-04 12:29:04, 506 ნახვა
საზოგადოება
სახელმწიფო ქონების ეროვნული სააგენტოს სერვისები უკვე იუსტიციის სახლშიც ხელმისაწვდომია
სახელმწიფო ქონების ეროვნული სააგენტოს სერვისები უკვე იუსტიციის სახლშიც ხელმისაწვდომია. ახალი მომსახურების დანერგვის შესახებ მემორანდუმს მხარეების მიერ დღეს იუსტიციის სახლში მოეწერა ხელი. პირველ ეტაპზე, სატესტო 2 თვიან რეჟიმში, სერვისი მარნეულის იუსტიციის სახლში იქნება ხელმისაწვდომი.
ახლადდანერგილი სერვისი მომხმარებლისთვის იუსტიციის სახლის საშუალებით, სახელმწიფო ქონების ეროვნული სააგენტოს რიგი მომსახურების მიწოდებას გულისხმობს და მისი მიღება სხვა უკვე არსებულ 400-მდე სერვისთან ერთად მინიმალურ დროში, მაღალი ხარისხის მომსახურებით იქნება შესაძლებელი.
იუსტიციის სახლის აღმასრულებელი დირექტორის მოადგილის ირაკლი ლომიძის განცხადებით, იუსტიციის სახლი სერვისის წარმატებით დანერგვისათვის მზადაა, რისთვისაც აღნიშნული სერვისის მიმართულებით უკვე გადამზადდა კადრები, რათა მომხმარებელს მომსახურებასთან ერთად კვალიფიციური კონსულტაციის მიღებაც შეეძლოს.
"იუსტიციის სახლი აგრძელებს აღებულ კურსს და მუდმივ რეჟიმში აფართოებს იმ 400-მდე სერვისის ჩამონათვალს, რომელთა მიღებაც იუსტიციის სახლშია შესაძლებელი. სერვისის დანერგვამდე ჩვენ დეტალურად მოვიკვლიეთ მომხმარებლის მოთხოვნა აღნიშნულ მომსახურებაზე, რის შედეგადაც გავაფორმეთ ურთიერთანამშრომლობის მემორანდუმი ქონების მართვის სააგენტოსთან. სერვისის მიღება ამ ეტაპზე მარნეულის იუსტიციის სახლშია შესაძლებელი და მომსახურება სრულიად უფასოა",-განაცხადა იუსტიციის სახლის აღმასრულებელი დირქტორის მოადგილე ირაკლი ლომიძემ.
როგორც სახელმწიფო ქონების ეროვნული სააგენტოს თავმჯდომარის პირველმა მოადგილემ, ეკატერინე სისაურმა, განაცხადა, სახელმწიფო ქონების ეროვნული სააგენტოს უმთავრეს პრიორიტეტს წარნოადგენს, იყოს ხელმისაწვდომი და მოქალაქეებს ქვეყნის მასშტაბით, სწრაფი და და ეფექტური მომსახურება შესთავაზოს.
"სწორედ ამიტომ იუსტიციის სახლთან ურთიერთთანამშრომლობის მემორანდუმი გაფორმდა, რომელიც იუსტიციის სახლის მარნეულის ფილიალში პროექტის საპილოტე ვერსიის დანერგვას გულისხმობს. აქ მოქალაქეებისთვის ხელმისაწვდომი იქნება სააგენტოს შემდეგი სერვისები: სახელმწიფოს საკუთრებაში არსებული სასოფლო-სამეურნეო დანიშნულების მიწის აუქციონის ფორმით პრივატიზება ან/და იჯრით აღება; სახელმწიფოს წილობრივი მონაწილეობით შექმნილი საწარმოს წილის/აქციების/ აუქციონის წესით პრივატიზება; სახელმწიფოს საკუთრებაში არსებული საწარმოს წილების/აქციების მართვის უფლებით გადაცემა; სახელმწიფო ქონების გადაცემა კერძო საკუთრებაში არსებულ ქონებაში",-აღნიშნა სახელმწიფო ქონების ეროვნული სააგენტოს თავმჯდომარის პირველმა მოადგილემ, ეკატერინე სისაურმა, და აქვე დასძინა, რომ 12-ვე იუსტიციის სახლში სახელმწიფო ქონების ეროვნული სააგენტოს სერვისები წლის ბოლომდე დაინერგება.
აღსანიშნავია, რომ იუსტიციის სახლის მარნეულის ფილიალის საპილოტე რეჟიმისთვის შერჩევა, ამ რეგიონში მომხმარებლის მიერ სახელმწიფო ქონების ეროვნული სააგენტოს სერვისზე არსებულმა დიდმა მოთხოვნამ განაპირობა. საპილოტე რეჟიმის დასრულებისთანავე, სერვისი იუსტიციის სახლის ყველა ფილიალში წარმატებით დაინერგება და სახელმწიფო ქონების ეროვნული სააგენტოს სერვისი საქართველოს ყველა რეგიონში ხელმისაწვდომი გახდება.
ავტორი: ირაკლი მანაგაძე , ექსპრესნიუსის რეპორტიორი 2009 წლიდან
epn.ge (@expressnews.ge)
