ლევან დავითაშვილი - ,,ექსპო 2020 დუბაი" კარგი შესაძლებლობაა, საერთაშორისო გამოფენის მილიონობით დამთვალიერებელი იმ პოტენციალს გაეცნოს, რომელიც საქართველოს გააჩნია

2021-12-29 16:05:08, 1623 ნახვა

ეკონომიკა

საერთაშორისო გამოფენის „ექსპო 2020 დუბაი“ ფარგლებში, დღეს, 29 დეკემბერს, დუბაიში საქართველოს ეროვნული დღე აღინიშნება. ღონისძიებაში მონაწილეობას იღებს ქართული დელეგაცია, რომელსაც ვიცეპრემიერი ლევან დავითაშვილი ხელმძღვანელობს.

„ჩვენი ქვეყნის პავილიონს დღეში ათასზე მეტი სტუმარი ჰყავს. ეს არის კარგი შესაძლებლობა, რომ საერთაშორისო გამოფენის მილიონობით დამთვალიერებელმა საქართველოს უნიკალური კულტურის, კულტურული მემკვიდრეობის, ისტორიის, ბიომრავალფეროვნების შესახებ გაიგოს; ასევე, გაეცნოს იმ პოტენციალს, რომელიც ჩვენს ქვეყანას გააჩნია. ჩვენი ქვეყნის სტრატეგიული მდებარეობა კარგი შესაძლებლობაა ბიზნესისთვის, კომერციისთვის, სავაჭრო და სატრანზიტო ურთიერთობების დამყარებისთვის. სწორედ ამაზეა აქცენტი გამოფენაზე წარმოდგენილ ქართულ პავილიონში. ჩვენ ხაზს ვუსვამთ, ერთი მხრივ, ჩვენ კულტურულ მემკვიდრეობას, რომელიც იუნესკოს მიერ არის აღიარებული და, მეორე მხრივ, ვამბობთ, რომ საქართველო არის თანამედროვე ქვეყანა, რომელიც თანამედროვე სამყაროს უამრავ შესაძლებლობებს სთავაზობს", - განაცხადა ლევან დავითაშვილმა.

„ექსპო 2020 დუბაიზე“ ქართული პავილიონი წარმოდგენილია ოთხი თემატური მიმართულებით - ტრადიციული მეღვინეობა, ქართული დამწერლობა, დინამიკური და განვითარებადი ტურისტული მიმართულება და ბიზნესგარემო.

აღსანიშნავია, რომ პანდემიის გამო, 2020 წელს გამოფენა ვერ ჩატარდა. გაერთიანებული საემიროების მთავრობის მაქსიმალური ძალისხმევით, 2021 წელს „ექსპო 2020 დუბაი” ჩატარება შესაძლებელი გახდა.

„ექსპო 2020 დუბაიში“ მსოფლიოს 191 ქვეყანა მონაწილეობს.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),