სალომე ზურაბიშვილი - დღეს ვართ ძალიან ახლოს ნატო-ს ღია კართან და ეს პრაქტიკულად იმ ოჯახში ყოფნაა

2021-07-02 16:55:01, 642 ნახვა

კომენტარი

დღეს ვართ ძალიან ახლოს ნატო-ს ღია კართან, ეს პრაქტიკულად იმ ოჯახში ყოფნაა, - ამის შესახებ საქართველოს პრეზიდენტმა სალომე ზურაბიშვილმა ნატო-ს გენერალური მდივნის სპეციალურ წარმომადგენელთან, ჯეიმს აპატურაისთან ერთობლივ ბრიფინგზე განაცხადა.

პრეზიდენტმა საქართველო-ნატო-ს ურთიერთობის განმტკიცებაზე ისაუბარ და ჯეიმს აპატურაის, გაწეული თანამშრომლობისთვის, მადლობა გადაუხადა.

„დღეს ჩვენ თუ ვართ ძალიან ახლოს ღია კართან და ვიცით, რომ ამას შეიძლება კიდევ რაღაც დრო დასჭირდეს, მაგრამ ეს არის პრაქტიკულად იმ ოჯახში ყოფნა, რადგან კარები კარებია, გაწევრიანება - გაწევრიანება, მთავარია, ჩვენი ყოველდღიური თანამშრომლობა ძალიან კონკრეტული იყოს. ძალიან ბევრი დარგია, რომელშიც ვთანამშრომლობთ და მათთან თანამშრომლობა გვაძლევს იმ გაზრდილ უსაფრთხოების განცდას, რაც არის აუცილებელი ჩვენი ქვეყნისა და ეკონომიკური განვითარებისთვის. ეს ძალიან სერიოზულ როლს თამაშობს. ჩვენ დღეს იმისთვის ვართ აქ, რომ მადლობა გითხრათ მეგობრობისთვის, მაგრამ ასევე გთხოვთ და ვიცი, რომ ამ თხოვნაზე პასუხი იქნება დადებითი, გთხოვთ, დარჩეთ ჩვენი მეგობარი იმ ახალ ფუნქციაში, ახალ თანამდებობაზე, რომელიც არანაკლებ მნიშვნელოვანი იქნება ჩვენი ქვეყნისთვის და ჩვენი ნატო-სთან ურთიერთობაში», - განაცხადა პრეზიდენტმა.

Patreon P მხარი დაუჭირე "ექსპრესნიუსს" →

ავტორი: ელენე გვიმრაძე, ექსპრესნიუსის რეპორტიორი 2018 წლიდან